«Որ Մայր տաճարի վերանորոգման գումարներ կարող են փոշիացվել, կարծում եմ՝ այդ խոսույթից մենք պետք է հրաժարվենք՝ հաշվի առնելով, թե ում մասին է խոսքը»,- այսօր կայացած մամուլի ասուլիսում հայտարարեց Գերաշնորհ Տեր Արշակ արքեպիսկոպոս Խաչատրյանը՝ պատասխանելով հարցին, որ Մայր տաճարի վերանորոգման շրջանում, որը բավական երկար տեւեց, խոսակցություններ շրջանառվեցին, թե նվիրատուների գումարները փոշիացվել են։ Նաև խոսակցություններ կան, որ Վեհափառը միանձնյա է տնօրինում գումարները։
«Մայր տաճարի շինարարությունն, ըստ էության, սկսվել է 2017-ին: 2012-ից 2017-ը ուղղակի ուսումնասիրական աշխատանքներ են արվել: Մայր տաճարի վթարայնությունը շատ պատահական է բացահայտվել: Երբ անհրաժեշտություն առաջացավ Մայր տաճարի գմբեթի խոտերը հեռացնել, պարզվեց, որ այդ ճաքերը խորանում են մինչեւ հիմքեր, այսինքն` Մայր տաճարը վթարային վիճակում էր: Հիմա ես ալտերնատիվ սցենարը չունեմ, թե նմանօրինակ մի կառույց, մի տաճար նորոգելու համար արդյոք ավելի կարճ ժամանակամիջոցում հնարավոր էր անել: Դա մասնագետները պետք է ասեն, եւ նրանք են, որ այս աշխատանքներն իրականացրել են: Ես կարծում եմ՝ ժամանակահատվածն օպտիմալ է եղել»,- ասաց նա:
Մայր Աթոռ Ս. Էջմիածնի Արտաքին հարաբերությունների և արարողակարգի բաժնի տնօրեն Տ. Նաթան արքեպիսկոպոս Հովհաննիսյանն էլ հորդորեց լրագրողներին. «Մի փնտրեք կոռուպցիոն ռիսկեր այնտեղ, որտեղ դրանք չկան, որովհետեւ միեւնույն է, սենսացիա չեք գտնի: Եթե լինի էլ, հնարավոր է, որ հնարովի մնացածին բաներ լինեն»:
Կարդացեք նաև
Մանրամասները՝ տեսանյութում
Նելլի ԳՐԻԳՈՐՅԱՆ
