«Ինչ-որ մի պահից սկսած Բագրատ Սրբազանը ներգրավվեց այնպիսի գործընթացների մեջ, որը ենթադրում էր քաղաքական գործիքակազմերի օգտագործում: Եկեղեցին, ինստիտուցիոնալ առումով, քաղաքական գործիքակազմեր չի կիրառում, իշխանության հասնելու որևէ ձգտում, առաջնահերթություն չունի։ Եվ եթե հետևել եք մեր հայտարարություններին, մենք այնտեղ արձանագրել ենք, որ հաշվի առնելով, որ քաղաքական գործունեությունն անհամատեղելի է հոգևոր ծառայության հետ, այդ իսկ պատճառով ընթացք է տրվել Բագրատ Սրբազանի խնդրանքին՝ առժամանակ դադարեցնելու, կասեցնելու իր հոգևոր ծառայությունը։ Այսինքն, այդ պահից սկսած Բագրատ Սրբազանը գործել է իր հոգևոր ծառայության կասեցման պայմաններում»,- այսօր կայացած մամուլի ասուլիսում ասաց Արշակ արքեպիսկոպոս Խաչատրյանը՝ հավելելով, որ այն դիրքորոշումներն ու մոտեցումները, որոնք ունեցել է Բագրատ Սրբազանը, արտացոլված են եղել նաև Գերագույն հոգևոր խորհրդի հայտարարություններում:
Լրագրողի հարցին՝ Բագրատ սրբազանն ունեցե՞լ է Վեհափառի օրհնությունը, երբ համաձայնել է դառնալ վարչապետի թեկնածու, քանի որ նա մշտապես հայտարարում է, թե իր գործողություններում ունի Վեհափառի օրհնությունը, Արշակ սրբազանն ասաց, որ առավել հստակ պատասխաններ չի կարող տալ, քանի որ նման իրավիճակ չի եղել, երբ հոգևորականը, տարբեր կուսակցությունների միահամուռ ցանկությամբ, առաջադրված լինի վարչապետի թեկնածու. «Ինքս խոսել եմ Բագրատ Սրբազանի հետ և համոզված եմ, որ վարչապետի թեկնածու դառնալը նրա լավագույն երազների ոլորտից չէր։ Ստեղծվել է իրավիճակ, երբ ինքը հարկադրված էր ընդունել այդ առաջարկը, քանի որ համախմբումն առաջացել էր իր անձի շուրջը: Այդ իրավիճակում մեր կողմից գտնված միակ լուծումն այն էր, որ պետք է առժամանակ կասեցվեր, սառեցվեր իր հոգեւոր ծառայությունը, որ հնարավորություն ունենար շարունակել: Ընտրությունն իրենն է: Բնականաբար, եթե հոգեւոր ծառայությունը կասեցվում է արժանապես, այս որոշման մեջ արտացոլված է նաեւ Եկեղեցու ամբողջական կեցվածքը»։
Մանրամասները՝ տեսանյութում
Կարդացեք նաև
Նելլի ԳՐԻԳՈՐՅԱՆ
