Մինչ ռազմական փորձագետներն ու վերլուծաբաններն ահազանգում են այն մասին, որ Ադրբեջանը պատրաստվում է նոր պատերազմի, թշնամու նշանառության տակ հայտնված Տավուշի գյուղերում իրենց աչքով են տեսնում ադրբեջանական շարժերը։ Մասնավորապես, Աճարկուտում գյուղացիների լարված հայացքների ներքո ադրբեջանական կողմը հողային աշխատանքներ է սկսել։ Երկու օր է՝ մեկնարկել են այդ աշխատանքները։
«Մոտ 15-20 զինվորականներ շատ ինտենսիվ աշխատանքներ են իրականացնում սահմանին անմիջապես մոտ՝ Կիրանցի նախկին խանութների տեղում, ներքեւում՝ գետի ափին, լճի հարակից տարածքներում»,- «Հրապարակ»-ին պատմեց Աճարկուտի ավագանու անդամ Կարեն Ղազարյանը՝ հավելելով, որ տրամադրությունները գյուղում լարված են՝ պայմանավորված այս աշխատանքներով։ Մարդիկ, նրա խոսքով, հույս էլ չունեն, որ եթե պատերազմ լինի, իրենց պաշտպանելու են՝ հաշվի առնելով, թե իշխանությունը որքան անատամ է։ Ըստ մեր զրուցակցի՝ երեւում է, որ ադրբեջանական կողմը Տավուշի այդ հատվածում ամրաշինական աշխատանքներ է իրականացնում ու, ինչպես մեր զրուցակիցն է կարծում, պատրաստվում է հնարավոր պատերազմին։ «Պատերազմի է պատրաստվում, բայց ոչ այս հատվածում, այստեղ ամրացնում են, դեռ 1-1,5 ամիս առաջ էլ ականապատում էին այդ տարածքները, դժվար թե այդտեղից իրենք փորձեն հարձակվել։ Հավանաբար, հարավային ուղղությամբ՝ այսպես կոչված, միջանցքի համար են պատրաստվում, իսկ էստեղ իրենց թիկունքն են ամրացնում»,- ահազանգում է Կարեն Ղազարյանը։
Ինչպես մեր զրուցակիցն է փոխանցում, Տավուշի՝ Ադրբեջանին հանձնված հատվածներում զինտեխնիկայի կուտակում չկա, բայց մարդուժի քանակն ամեն օր ավելանում է, ու դա նկատելի է։ Կարեն Ղազարյանին լուրեր են հասել, որ Սյունիքի հատվածում էլ է ադրբեջանական կողմն ակտիվացել։
«Ես տեղեկացա, որ էնտեղ՝ սահմանին, զինտեխնիկայի կուտակում կա։ Խոսել եմ Կապանի հատվածում մեր ընկերների հետ, ովքեր տեսել են ու ասացին, որ, այո՛, զինտեխնիկայի կուտակում կա»,- պատմեց Կարեն Ղազարյանը։
Մարիաննա ՂԱՀՐԱՄԱՆՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
