«Եթե հիշում եք, Նիկոլ Փաշինյանն իշխանության գալով՝ փոխեց Հայաստանի Հանրապետության ապառազինությունների գնման պլանը եւ գնեց իր սելֆիի ՍՈւ-երը՝ մարդկության պատմության մեջ ամենաթանկ սելֆին՝ մի քանի տասնյակ միլիոն դոլար։ Ըստ մեր թողած սպառազինությունների գնման պլանի՝ նախատեսված էր գնել շուրջ 2500 ԱԹՍ, որոնց շուրջ կեսը պիտի հասներ ՀՀ եւ ընդունվեր ՀՀ ԶՈւ սպառազինության շարքեր մինչեւ 2020 թվականը։ Բայց Փաշինյանը փոխեց դա, փոխարենն առավ իր սելֆիի ՍՈւ-երը, որոնք պատերազմական գործողություններում որեւէ կերպ չեն օգտագործվել։ Դե հիմա թող գնան պատասխան տան, մի հատ էլ դրա ներողություն խնդրեն, որ մենք ԱԹՍ չենք ունեցել 44-օրյա պատերազմին»,- ԱԺ ճեպազրույցների ժամանակ ասաց «Պատիվ ունեմ» խմբակցության պատգամավոր Հայկ Մամիջանյանը։
Մամիջանյանն անդրադարձավ նաեւ «խաղաղության պայմանագրի» նախագծին, ասաց․ «Այդ փաստաթուղթը խաղաղության պայմանագիր անվանելը մեղք է։ Ես չգիտեմ, թե որն է այդ կետը, որը հանել են։ Այսպես կոչված խաղաղության պայմանագիրը վաղուց արդեն իր բովանդակությամբ անընկալելի փաստաթուղթ է դարձել ինձ համար, գերիների վերաբերյալ բոլորն ասացին, որ չկա, սահմանազատումը դրա հետ չի կապվում, տրանսպորտային հանգույցների հարցը հանված է, չկա։ Լավ, մեր շահը ո՞րն է, անո՞ւնը՝ խաղաղության պայմանագիր, որ հաջորդ քարոզարշավին ասեն՝ ապագա կա ու խաղաղություն կա՞։ Այսինքն՝ իրենք Ադրբեջանից հիմա գնում են հաջորդ քարոզարշավի սլոգանը։ Իսկ ինչո՞վ է վճարելու դրա դիմաց՝ ՀՀ անվտանգային շահերով։ Ի՞նչ գյուղ ուզում եք, կտանք, մենակ թողեք խաղաղություն բառը ես հաջորդ ընտրություններին օգտագործեմ․ Նիկոլ Փաշինյան»։
Ինչ վերաբերում է սահմանազատման կանոնակարգի տեքստին՝ Մամիջանյանն ասաց․ «Ադրբեջանն իրեն հետաքրքրող հատվածներում կարող է ստանալ սահմանազատման հատվածային եւ ըստ կանոնակարգի վերջնական լուծումներ, ինչպես արեց Կիրանցում, երբ մենք չորս գյուղ կորցրեցինք, որից հետո վերջնական գործընթացին նույնիսկ չգնաց։ Եվ այդ հատվածային սահմանազատումները կարող են լինել վերջնական, անբեկանելի, առանց ներպետական փուլեր անցնելու։ Այսինքն՝ միանձնյա զիջումների մասին ենք մենք խոսում»։
Մանրամասները՝ տեսանյութում
Կարդացեք նաև
Ռոզա ՀՈՎՀԱՆՆԻՍՅԱՆ
