Սիսիան համայնքի ավագանու չորրորդ նստաշրջանի 2024թ․ սեպտեմբերի 13-ին հրավիրված նիստը չի կայացել՝ քվորում չլինելու պատճառով։ Նիստի միակ մասնակիցը Սիսիանի համայնքապետ Արմեն Հակոբջանյանն էր։ Օրակարգում 19 հարց էր ընդգրկված։
Հիշեցնենք, 2023թ․ մարտի 26-ին կայացած Սիսիանի ավագանու ընտրությունների արդյունքում ավագանու 21 մանդատից 13-ը տնօրինում է «Քաղաքացիական պայմանագիրը», 5-ը՝ ՀՀԿ-ն, իսկ 3-ը՝ «Քաղաքացու որոշում» կուսակցությունը։
Ըստ մեր աղբյուրների, կառավարող ուժը ցանկանում է պաշտոնանկ անել իր կուսակից համայնքապետին՝ Արմեն Հակոբջանյանին, ինչով էլ պայմանավորված է ավագանու նիստը բոյկոտելը։ Զանգահարեցինք Սիսիանի ավագանու «Քաղաքացիական պայմանագիր» խմբակցության անդամներին, սակայն նրանցից ոչ մեկը չպատասխանեց մեր հեռախոսազանգերին։ Արմեն Հակոբջանյանը նույնպես անպատասխան թողեց մեր հեռախոսազանգը։
Կարդացեք նաև
Հիշեցնենք, որ մամուլում շրջանառվող տեղեկությունների՝ Արմեն Հակոբջանյանը Ազգային ժողովի ՔՊ-ական պատգամավոր Կարեն Համբարձումյանի ազգականն է, եւ հենց վերջինս էր ամեն ինչ անում, որպեսզի Հակոբջանյանը դառնա Սիսիանի համայնքապետ։ Ըստ մեր տեղեկությունների՝ Կարեն Համբարձումյանը ազգական համայնքապետին առաջարկել է հրաժարականի դիմում ներկայացնել, սակայն Արմեն Հակոբջանյանը չի ենթարկվել պատգամավորին։ Հենց այս պատճառով էլ, ըստ երեւույթին, ՔՊ-ական ավագանու անդամները սկսել են բոյկոտել նիստերը։
