Շախմատի Հայաստանի տղամարդկանց եւ կանանց ազգային հավաքականները երրորդ անընդմեջ հաղթանակն են տարել Բուդապեշտում ընթացող 45-րդ համաշխարհային օլիմպիադայում: Մեր երկու թիմերն էլ մրցակցի նկատմամբ առավելության են հասել միեւնույն 3:1 հաշվով:
Բրազիլիայի հետ խաղում Հայկ Մարտիրոսյանը (1-ին խաղատախտակ), եւ Գաբրիել Սարգսյանը (3-րդ)բաժանել են միավորը, իսկ Շանթ Սարգսյանը 2-րդ խաղատախտակի առջեւ եւ Կարեն Գրիգորյանը՝ 4-րդ, ապահովել են հավաքականի հաղթանակը:
Ընդ որում, միայն Կարեն Գրիգորյանն է մասնակցել երեք տուրերին ու բոլորում էլ պարտության է մատնել մրցակիցներին:
Կարդացեք նաև
Հայաստան-Հունգարիա 2 կանանց դիմակայությունը շատ դրամատիկ է ստացվել: Առաջին խաղատախտակի առջեւ Լիլիթ Մկրտչյանից մեծ ջանքեր են պահանջվել պարտիան ոչ-ոքի ավարտելու համար, իսկ Էլինա Դանիելյանը միայն 67-րդ քայլում է կարողացել Դորինա Դեմետերին «համոզել», որ դիմադրելն այլեւս անիմաստ է:
Իսկ մինչ մեր երկու փորձառու շախմատիստուհիները կցուցադրեին իրենց գրոհելու եւ պաշտպանվելու արվեստը, Մարիամ Մկրտչյանը արդեն երրորդ անընդմեջ հաղթանակն էր տարել այս օլիմպիադայում, իսկ Սուսաննա Գաբոյանը կես միավոր էր բերել մեր թիմին:
Այսօր կայանալիք 4-րդ տուրում մեր տղաների մրցակիցը Չինաստանի ահեղ թիմն է, իսկ աղջիկներինը՝ Վիետնամը:
Աշոտ ՀԱԿՈԲՅԱՆ
