Սեպտեմբերի 12-ին և 13-ին Երևանում տեղի ունեցավ «Վնասվածքային ընդլայնված կենսապահովում» թեմայով դասընթաց, որը վարում էին ԱՄՆ և Մեքսիկայից ժամանած, ինչպես նաև հայաստանյան լավագույն բժիշկ-հրահանգիչները։ Նրանց բոլորին մեկ ծրագրի շուրջ համախմբել էր վնասվածքաբան-օրթոպեդ Վաչե Համբարձումյանը, ով բժիշկների վերապատրաստման բազմամյա փորձառություն ունի։
Դասընթացին ներկա էին մոտ տասնյակ բուժհաստատությունների և Երևանի «Շտապ բուժօգնություն» ՓԲԸ բժիշկները։ «Թրավելինգ դոքթորս» առողջապահական հասարակական կազմակերպությունն այսօրինակ դասընթացներ է ունենում տարեկան մի քանի անգամ՝ Հայաստան հրավիրելով ոլորտային լավագույն մասնագետներին։ Նախորդող երկու օրերին բժշկական մանեքենների կիրառմամբ՝ բժիշկները փորձարկեցին միջամտություններ, դիտարկեցին պրակտիկ աշխատանք, իրականացրեցին փորձի փոխանակում և քննարկեցին լավագույն փորձի տեղայնացման հնարավորությունները։
Տարիներ շարունակ վերապատրաստելով և նպաստելով բժիշկների շարունակական մասնագիտական զարգացմանը՝ այժմ «Թրավելինգ դոքթորս»-ը նպատակ ունի ինստիտուցիոնալացնել ծրագրերը՝ համագործակցելով ՀՀ Առողջապահության նախարարության և ՀՀ ԱՆ Առողջապահության ազգային ինստիտուտի հետ։ Առաջիկայում պլանավորվում է իրականացնել ավելի լայնամասշտաբ ծրագրեր՝ ներգրավելով ավելի մեծ թվով բժիշկների և գործընկեր կառույցների։
ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
