Կառավարության շենքի մոտ այսօր դարձյալ բողոքի ցույցի են դուրս եկել բանակում ոչ պատերազմական իրավիճակում զոհված զինծառայողների ծնողները։ Նրանց թվում են Իրինա Ղազարյանը, Գոհար Սարգսյանը, Նանա Մուրադյանը, որոնք տարիներ շարունակ պայքարում են իրենց որդիների մահվան հանգամանքները բացահայտելու համար։
«Աթոռ են զբաղեցնում միայն, երկրի ղեկավար է, ո՞վ է պատասխան տալու մեր երեխեքի սպանության համար։ Մեկ հոգու համար հազար հոգի մարդ է գնում, ի վերջո երեխա ենք տվել բանակին։ Ո՞վ պիտի պատասխան տա, որ մեր երեխեքի գլուխը խաղաղ պայմաններում կերել են»,- կառավարության անդամների ծառայողական մեքենաների շարասյան հետեւից բացականչեց Իրինա Ղազարյանը։ Գոհար Սարգսյանն էլ ասաց, որ թիվ մեկ մեղավորը Նիկոլ Փաշինյանն է ու նրա կողքինները։
Ըստ ծնողների՝ Աննա Վարդապետյանը, նախքան գլխավոր դատախազ նշանակվելը, խոստացել է, որ կբացահայտի իրենց որդիների գործերը։ «Ի՞նչ եղավ, թե՞ բոլորին աթոռ է պետք։ Նախկին են ասում, նախկինի ժամանակ ո՞նց է եղել, հիմա ներկան տեսեք ինչ է կատարվում, բարդակ է»,- ասացին նրանք։
Մանրամասները՝ տեսանյութում
Կարդացեք նաև
Ռոզա ՀՈՎՀԱՆՆԻՍՅԱՆ
