ՀՀ Սահմանադրության մեջ տարածքային պահանջ չկա Ադրբեջանի նկատմամբ։ Այս մասին ԱԺ-կառավարություն հարցուպատասխանի ժամանակ ասաց Նիկոլ Փաշինյանը։ «Հղում է արվում Լեռնային Ղարաբաղի եւ Հայաստանի վերամիավորման մասին դրույթին։ Ես էլի ասում եմ՝ հռչակագրում կա 5-րդ հոդված, որն ասում է՝ Հայաստանն իր անվտանգությունը պաշտպանելու համար Գերագույն խորհրդին ենթակա զորքեր է ստեղծում եւ անվտանգության այլ մարմիններ։
Հիմա ԱԺ-ին չեն ենթարկվում այդ մարմինները, դա նշանակում է ի՞նչ, հակասահմանադրակա՞ն է դա։ Ոչ, որովհետեւ Սահմանադրությունն Անկախության հռչակագրից վերցրել է այն բովանդակությունը, որը տառացի եւ բառացի արտահայտված է։ Ասում է՝ օրենքը կարդա, ինչ մեջը գրված է, դա է օրենքի բովանդակությունը, չի կարելի կարդալ ու մեկնաբանել, ինչ գրած է, այն էլ նշանակում է։ ՀՀ Սահմանադրության մեջ չկան տարածքային պահանջներ Ադրբեջանի նկատմամբ, եւ մենք չունենք տարածքային պահանջներ Ադրբեջանի նկատմամբ»,- ասաց նա։
Նիկոլ Փաշինյանը հավելեց․ «Ադրբեջանը Հայաստանի Սահմանադրության հետ կապված քննարկումով փակուղի է տանում խաղաղության պայմանագրի գործընթացը, որ ստիպված չլինի անդրադառնալ կամ իր Սահմանադրության մեջ բաց պահի Հայաստանի նկատմամբ ունեցած տարածքային պահանջները»։
Փաշինյանը նաեւ ասաց՝ եթե այդ թուղթը ստորագրվի, վավերացվի, Ադրբեջանի մտահոգությունները դուրս են գալիս։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
