Ազգային ժողովում այսօր «Ֆիզիկական կուլտուրայի եւ սպորտի մասին» օրենքում փոփոխություններ եւ լրացումներ կատարելու մասին օրենքի նախագծի հարակից զեկուցող, ԱԺ կրթության, գիտության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի անդամ Հասմիկ Հակոբյանը ներկայացվող հիմնական փոփոխությունների մեջ առաջնահերթ կարեւորեց «հավաքական թիմ» բառերը «հավաքական» բառով փոխարինելու անհրաժեշտությունը: «Նախ, օրենքի ամբողջ տեքստից «հավաքական թիմ» բառերը փոխարինվում են «հավաքական» բառով՝ հիմք ընդունելով այն, որ «հավաքական թիմ» բառը սովետական օլիմպիական գրականության տերմինաբանություն է»:
Հետո անդրադարձավ հաջորդ դրույթին. «Մի քանի մարզաձեւեր ներառվում են պարգեւատրվող մարզաձեւերի ցանկ: Դրանք են՝ կարատե, քիկ-բոքսինգ եւ մուայ-թայ: Հաջորդ լրացումը բխում է Հայաստանի Հանրապետության ֆիզիկական կուլտուրայի եւ սպորտի ոլորտների 2024-2030 թվականների զարգացման ռազմավարությունից, որով, ինչպես գիտենք, ենթադրվում է, որ խոշորացված համայնքներում պետք է կառուցվեն տիպային մարզահամալիրներ, որոնք պետք է ներառեն նաեւ ֆիթնեսը: Ներկայացված նախագծով նախատեսվում է ֆիթնես մարզիչների արտոնագրում եւ սահմանել արտոնագրման կարգը: Այս դրույթի հետ կապված, որոշակի լրամշակումներ պետք է արվեն առաջինից երկրորդ ընթերցում»,-ասաց նա՝ նշելով, որ այս տեսքով նախագծին իրենց հանձնաժողովը տվել է դրական եզրակացություն: Հասմիկ Հակոբյանը կոչ արեց քվեարկել այս նախագծի օգտին:
Պատգամավոր Սերգեյ Բագրատյանը նկատեց, թե բոլոր լեզուներում էլ կան «հավաքական թիմ», «հավաքական» եւ «թիմ բառերը» եւ դրանց իմաստները ճիշտ են, հետեւաբար, ինչի՞ են որոշել «թիմը» հանել: «Ինչպես ասվեց, դա գալիս է сборная команда տերմինից, իսկ հավաքականը արդեն ներառում է հավաքական թիմ հասկացությունը: Այնպես որ, սա ավելորդաբանություն է, որը ինչպես նաեւ ռուսաբանություն է: Ընդամենը հայոց լեզվի անաղարտությունը ապահովելու համար է այս դրույթը»,-ասաց Հասմիկ Հակոբյանը՝ վստահ լինելով, որ «հավաքական» բառի մեջ ամեն ինչ հասկացվում է:
Սակայն Սերգեյ Բագրատյանը ընդգծեց, որ նրա բացատրածից ոչ մի բան էլ չհասկացավ, կարծում է, որ այս փոփոխությունը տրամաբանական չէ: Նա հորդորեց ձեռնպահ մնալ այս փոփոխությունից: «Այն, ինչն ավանդույթային է, գրեթե օրենքի ուժ ունի: Պահպանեք այս ավանդույթը: Սա իմ առաջարկն է, խնդրում եմ այն քննարկել»,-ասաց պարոն Բագրատյանը, ինչին համազեկուցողը հակադարձեց. «Դուք իրականում ասում եք այն, ինչ որ նախագծով առաջարկվում է. նոտարիուս, հետո ԶԱԳՍ»:
Կարդացեք նաև
Աշոտ ՀԱԿՈԲՅԱՆ
