Գյումրու Ասլամազյան քույրերի պատկերասրահում բացվեց ծննդով գյումրեցի, մասնագիտությամբ իրավաբան Մարինե Մանուկյանի անհատական ցուցահանդեսը, որը կրում է «Լռության ձայն» խորագիրը։ Ցուցահանդեսին մեծ թվով մարդիկ էին մասնակցում․ պատկերասրահի բակում կանգնելու տեղ անգամ չկար․ արվեստագետներից, իրավաբաններից բացի ներկա էին նաև գործարարներ, ՀՀ արդարադատության նախկին նախարար Հովհաննես Մանուկյանը (ի դեպ, նկարչուհին նրա հարազատ քույրն է), Շիրակի նախկին մարզպետ Արարատ Գոմցյանը։
Նկարչուհին ծնվել է Գյումրիում, այնտեղ բնակվել է մինչև երկրաշարժը։ Երբ քաղաքը վերածվել է ավերակների, նա անչափահաս է եղել, լքել է Գյումրին՝ ծննդավայրի վառ պատկերը սրտում։
Կարդացեք նաև
«Հարազատ քաղաքում ցուցահանդես անցկացնելու միտքը վաղուց էր ծնվել՝ դեռ մի քանի տարի առաջ։ Սա իմ թվով երրորդ անհատական ցուցահանդեսն է, բայց պիտի անկեղծանամ ձեզ հետ ու ասեմ, որ ամենից շատ հենց այսօր եմ հուզվում։
Իմ ծննդավայր Գյումրիի հետ են կապված մանկությանս ամենաջերմ հուշերը։ Գյումրիում ապրել եմ մինչև երկրաշարժը, տեղափոխվեցի Երևան, երբ դեռ անչափահաս էի ու երբ ինձ համար այդքան հարազատ քաղաքը մի քանի րոպեում վերածվեց ավերակների։ Ես լքեցի քաղաքս ծանր սրտով, ու այդ զգացողությունն ինձ հանգիստ չէր տալիս։ Հիմա վերադարձել եմ վերածնված Գյումրի՝ հարազատ քաղաքիս բերելով մի քիչ սեր ջերմություն, արևներ։
Ես սկսեցի նկարել բավական ուշ, երբ ասելիքս չէր տեղավորվում իմ ընտրած մասնագիտության շրջանակներում, երբ զգացմունքներիս ու հույզերիս արտահայտման ավելի հարմար միջոց չկարողացա գտնել։
Իմ գեղանկարների միջոցով փորձում եմ լսելի դարձնել լռության ձայնը, և այն փոքր- ինչ խլացնել դրական զգացողություններով»,-ասաց Մարինե Մանուկյանը։
Նախկին մարզպետ Արարատ Գոմցյանն էլ իր ելույթում ասաց, որ ինքն է բանակցել Ասլամազյանների հետ՝ նրանց հավաքածուն երկրաշարժից հետո ամբողջովին Գյումրի տեղափոխելու շուրջ՝ խոստանալով, որ գյումրեցիները պալատը կվերականգնեն, նոր շունչ կտան։ Այդպես էլ եղել է։
«Կարծում եմ՝ Մարինե Մանուկյանի և Գյումրու հայտնի նկարիչների, նկարչուհիների նման ցուցահանդեսներով այս փառահեղ պալատը նոր շունչ է ստանում։ Մասնակիցներին պատիվ է բերում ներկա լինել այստեղ, շնչել Գյումրվա օդը, շունչը, որը արվեստագետի շունչ է, արվեստագետի օդ է», -հպարտությամբ ասաց նախկին մարզպետը։
Մարինե Մանուկյանը ՀՀ նկարիչների միության անդամ է։ Ինչպես բնութագրեց ՀՀ նկարիչների միության նախագահ Սուրեն Սաֆարյանը, նա շատ ակտիվ է, մասնակցում է բոլոր նախագծերին, ցուցահանդեսներին։
«Զարմանալի կարողության տեր է, ունենալով իր առաջին մասնագիտությունը բոլորիս հայտնի, կարողանում է մեկտեղել, ժամանակ գտնել և ստեղծագործել», -ասաց նկարիչների միության նախագահը։
Նրա մեկնաբանմամբ՝ Մարինե Մանուկյանի պատկերած արևները նրա հոգու ու սրտի պատկերն են։
Նունե ԱՐԵՎՇԱՏՅԱՆ
