Մենք կարծես լիովին չենք գիտակցել եւ չենք ուզում գիտակցել, թե ինչ է փոխվել տարածաշրջանում. այսօր «Սրբազան» շարժման կազմակերպած «Դեպի կայուն եւ երկարաժամկետ խաղաղություն» թեմայով քննարկման ժամանակ կարծիք հայտնեց թուրքագետ, ԵՊՀ արեւելագիտության ֆակուլտետի դեկան Ռուբեն Մելքոնյանը:
Նրա դիտարկմամբ, Թուրքիան եւ Ադրբեջանն այլեւս մեկ միավոր են տարածաշրջանում եւ մեր բոլոր քայլերն ու գործողությունները մենք պետք է կառուցենք՝ ելնելով այս իրողությունից. «Իրատես լինենք եւ պատկերացնենք, որ օրինակ, Ջերմուկի հարցում մենք գործ ունենք այդ տանդեմի հետ, այլապես ամենը վերածվելու է պոռոտախոսության»:
Բանախոսի գնահատմամբ, եթե 1990-ականներին Թուրքիան տեսականորեն էր աջակցում Ադրբեջանին, այժմ գործնական քայլերի է անցել: Այժմ կա թուրքական օրակարգի ավելացում եւ դրա դեմ Հայաստանի հնարավորությունները զրոյական են. դրանք զսպող մեխանիզմներ մենք ինքներս չունենք, բայց տարածաշրջանային զարգացումների համատեքստում դրանք երբեմն դրսեւորվում են ու դրանցից մեկն էլ Իրանի դիրքորոշումն է: ՀՀ-ում Իրանի դեսպանը, երեկ, հիշեցնենք, վերահաստատեց «Զանգեզուրի միջանցքի» մասով իր երկրի դիրքորոշումը:
Կարդացեք նաև
Ռուբեն Մելքոնյանի պնդմամբ, Հայաստանը չի կարող քայլեր եւ առաջարկներ անել, քանի որ դրանք լսելի չեն, պարտված Հայաստանը չունի ռեսուրս իր կարծիքներն առաջարկելու եւ դրանք առաջ տանելու:
Ըստ նրա, 19-րդ դարի ֆիդայական երգերով հասարակության պատրաստել 21-րդ դարում Թուրքիայի հետ առճակատվելուն, կործանարար է:
Մանրամասները՝ տեսանյութում
Նելլի ԳՐԻԳՈՐՅԱՆ
