«Ես ուզում եմ խոսել մեր ռազմաքաղաքական վերնախավի մասին, ովքեր այսօր պատանդ են Ադրբեջանում… Ուզում եմ խոսել նաեւ Ռուբեն Վարդանյանի մասին: Այստեղ մարդկանց մեծարելու խնդիր չկա… Ցավոք, մեր հասարակության մեծամասնությունը տեղյակ չէ շատ բաներից ու լսում է միայն այստեղի ղեկավարի մամուլի ասուլիսի ժամանակ հայտնած կասկածները Ռուբեն Վարդանյանի մասին:
Տարօրինակն այն է, որ երբ ինքը (Նիկոլ Փաշինյանը-Գ.Հ.) նման կասկածներ է հայտնում, մեկը չկա ասի՝ եթե դու երկրի ղեկավար ես ու դու տեղյակ չես՝ ով էր այդ մարդը, նշանակում է՝ դու լավ ղեկավար չես եւ չգիտես քո երկիրը ոնց ղեկավարել» ,-«Հայելի» ակումբում նշեց Արցախի խորհրդարանի պատգամավոր Մետաքսե Հակոբյանը:
«Ես հիշում եմ մեր առանձնազրույցներից մեկը Ռուբեն Վարդանյանի հետ… Երեւի 2023-ի հուլիս ամիսն էր, խոսում էինք Արցախը սիրելու մասին, ու գիտե՞ք ինքը ինչ ասաց… Շատ խորը մնացել է դա իմ հիշողության մեջ… Ասում էր՝ ինձ թվում էր՝ շատ բան եմ արել իմ ժողովրդի համար, իմ հայրենիքի համար: Մտածում եմ՝ եթե մի օր իմ փոքր որդին ինձ հարց տա՝ պապ, դու ինչու ես հայ, ինչ եմ պատասխանելու… Ասում է՝ փորձեցի իմ տված հարցին պատասխանել ու հասկացա, որ չունեմ պատասխան, որովհետեւ հայրենիքին օգնելով ու ֆինանսական աջակցությամբ չէ հայ լինելը… Ասում է՝ հենց այդ օրը որոշում կայացրի՝ գալ ապրել Արցախում, այնտեղ, ուր իմ հայրենակիցները դժվարության մեջ են»,-հիշեց Մետաքսե Հակոբյանը։
Արցախի պատգամավորը հավելեց, որ Նիկոլ Փաշինյանի ասածից հետո շատերը փորձել են ինչ-ինչ գուշակություններ անել. «Մտածում են՝ տեսնես ի՞նչ շահ ուներ Ռուբեն Վարդանյանը, որ եկավ Արցախ… Իր շահը դա էր: Երբ մարդը ինքնաբավ է, երբ թե ֆինանսական, թե ճանաչելիության հարցում հասել է գագաթնակետին՝ իր պատկերացումներում, ինքն իրեն վերագտնելու խնդիր ունի, եւ Արցախ գալով Ռուբեն Վարդանյանը այդ խնդիրն, ըստ էության, լուծեց:
Կարդացեք նաև
Սկզբում մենք էլ ունեինք որոշ կասկածներ, բայց 5-10 հանդիպում, զրույցներ, իր արածները տեսնելուց հետո հասկացանք, որ մարդը զգում է իր հայրենիքը եւ այդ հայրենիքը իրեն էր զգում… Արցախցիները սկսեցին սիրել ու գնահատել նրա արածները, որովհետեւ երբ շրջափակման ժամանակ շատ մեծահարուստներ ու հնարավորություններ ունեցող մարդիկ չէին ապրում ժողովրդի պես, Ռուբեն Վարդանյանը մեր բոլորի հետ էր, եթե խանութներում հաց չկար, ուրեմն հաց չուներ նաեւ ինքը…»:
Գոհար ՀԱԿՈԲՅԱՆ
