Սեպտեմբերի 6-ին նշանակված էր Բագրատ Սրբազանի նկատմամբ զրպարտության գործով առաջին դատական նիստը, որը, սակայն հետաձգվեց պատասխանող կողմի պահանջով: Ինչպես լրագրողների հետ զրույցում նշեց Բագրատ Սրբազանի շահերի ներկայացուցիչ փաստաբան Աննա Փիլոսյանը՝ նման բան կանխատեսում էին. «Առաջին դատական նիստը հետաձգվեց՝ պատճառաբանությամբ, որ գործի նյութերին ծանոթ չեն, նոր է ներգրավել Քաղաքացիական պայմանագիր կուսակցության ներկայացուցիչը, եւ անհրաժեշտություն ունի գործի նյութերին ծանոթանալու…Կանխատեսելի վարքագիծ էր, որովհետեւ կարծում ենք, որ պատասխանող կողմը ամեն կերպ ձգձգելու է գործի քննությունը՝ հաշվի առնելով հայցի առարկան (պատվի արժանապատվությանը վերաբերվող հայց է ներկայացվել), որպեսզի ժամանակի ընթացքում հարցի հետաքրքրությունը նվազի, եւ բարենպաստ դատական ակտի պարագայում անգամ այլեւս համաչափ արձագանք չլինի տարածված արատավորող տեղեկատվությանը»:
Փաստաբանի խոսքով, դատարանը բավարարել է միջնորդությունը, հաջորդ դատական նիստը նշանակվել է նոյեմբերի 11-ին: Նա նշեց, քանի որ Civic.am կայքի դոմենը գրանցված է Քաղաքացիական պայմանագիր կուսակցության անվամբ, հայցը հարուցվել է Քաղաքացիական պայմանագիր կուսակցության նկատմամբ, հաշվի առնելով այն, որ իրավական տեսանկյունից՝ կայքը իրավունքի սուբյեկտ չէ:
Հիշեցնենք, որ Բագրատ արքեպիսկոպոս Գալստանյանը հայցադիմում էր ներկայացրել դատարան՝ ընդդեմ Civic.am-ի լրագրող Դավիթ Լեւոնյանի եւ ՔՊ կուսակցության՝ պահանջելով հերքել իր մասին զրպարտություն հանդիսացող տվյալները։
Սրբազանը նաեւ պահանջում է դատարանից՝ պարտավորեցնել Դավիթ Լեւոնյանին և ՔՊ-ի անունով գրանցված Civic.am-ին հրապարակայնորեն՝ նույն եղանակով, ինչ տարածվել է զրպարտությունը, հերքել իր վերաբերյալ զրպարտությունը, որտեղ մասնավորապես ասվում է. «Զբաղվում է հայրենավաճառությամբ, փորձում է Հայաստանը ներքաշել պատերազմի մեջ, դրա փոխարեն Կրեմլից ստանում է միլիոնավոր դոլարներ, սնանկացման է հասցրել, գումարներ է վատնել, միգուցե եւ անձնական հաճույքների համար օգտագործել, փորձել է գահընկեց անել Գարեգին Բ-ին, ԿԳԲ-ի գործակալ է, պատերազմ է հրահրում հայ-ադրբեջանական սահմանին, փորձում է իրականացնել հեղաշրջում, հրաման է ստացել ԿԳԲ-ից, առաջ է շարժում ռուս-ադրբեջանական շահերը, եկեղեցին դարձրել է բիզնեսի միջոց»։
Կարդացեք նաև
Հարցին՝արդյոք ԱԱԾ հերքումը Դավիթ Լեւոնյանի հրապարակման առնչությամբ չի որոշում գործի ելքը՝ հօգուտ սրբազանի, փաստաբանն այսպես արձագանքեց. «Ապացուցողական մեծ հենք ստեղծում է, իմ գնահատմամբ՝ այո, արդեն իսկ բացառում է այդ տեղեկությունների իրականությանը համապատասխանելու հանգամանքը, ինչը ենթադրում է հայցի աներկբա բավարարում, սակայն, այնուամենայնիվ ապացույցի գնահատումը դատարանի հայեցողության դաշտում է, հետեւաբար պետք է սպասենք, թե դատարանն ինչպես կգնահատի եւ կարձագանքի այդ ապացույցին»:
Գոհար ՀԱԿՈԲՅԱՆ
