Իտալիան բացի հոյակերտ ճարտարապետությունից, օպերաներից ու նորաձեւությունից ասոցացվում է նաեւ համեղ սննդի հետ: Սննդի հանդեպ վերաբերմունքը Իտալիայում արվեստային է, անգամ պաշտամունքային: Գաստրոնոմիկ ավանդույթներ ունեցող այս երկրում այլ կերպ հնարավոր չէ: Իտալիայիով հետաքրքրված զբոսաշրջիկների մեծ մասը հաստատ ցանկություն կունենա այցելել տեղական պանրի, պրոշուտոյի արտադրամաս կամ գինու գործարան:
Հայաստանցի զբոսաշրջիկների մի խմբով այցելելեինք Իտալիայի հյուսիսում՝ Պարմայում ապրող ընտանիքի, որը պրոշուտոյի արտադրամաս ուներ: Ի դեպ, Պարման հայտնի է որպես ՅՈՒՆԵՍԿՕ-ի գաստորոնոմիկ կենտրոն: Արտադրամասի տերը մանրամասն ներկայացրեց, թե ինչ է իրենից ներկայացնում Prosciutto di Parma-ն, ինչպես են այն պատրաստում, ինչպես են համապատասխան մասնագետները որակի նշան տալիս իրենց արտադրանքին, որը ոչ այլ ինչ է, քան դաջվածք ապխտած մսի վրա: Այդ դաջվածքը պատկերում է Պարմայի դքսության հնգածայր թագը: Պրոշուտոյի արտադրությամբ զբաղվող իտալացին այս առումով նույնիսկ կատակեց, թե խոզերը մարդկանցից ավելի շուտ են դաջվածք ունեցել:
Նաեւ ասաց, որ բիզնեսը ժառանգել է ծնողներից, զարգացրել ու ընդարձակել տիկնոջ հետ, ափսոսանք հայտնեց, որ զավակներն այլ ուղի են ընտրել:
Կարդացեք նաև
Ասում են՝ պրոշուտոյի պատրաստման տեխնոլոգիային առաջն անգամ անդրադարձել է հռոմեացի մշակութային եւ պետական գործիչ, գրող Մարկոս Տերենտիոս Վառոն մթա 1-ին դարում՝ իր «Գյուղատնտեսության մասին» երկում, որից ընդամենը պատառիկներ են պահպանվել ու փոխանցվել:
Ինչ վերաբերվում է հատկապես Պարմայի պրոշուտոյին, այն տարբերվում է եւ իր որակով եւ նուրբ քաղցր համով՝ այլ շրջաններում պատրաստված պրոշուտոներից, որովհետեւ Պարմայի պրոշուտոյի հումքը հենց Պարմայում աճեցված հատուկ ցեղատեսակի խոզի միսն է, նաեւ այս պրոշուտոյի դեպքում բացի աղից այլ համեմունք չի օգտագործվում:
Պրոշուտոն Իտալիայում ընդունված է մատուցել հատկապես սեխով, չնայած երբեմն այլ կերպ էլ է մատուցվում: Իտալացիները սննդային հստակ ավանդույթներ ունեն, որոնցից որոշները խախտելը ընկալվում է իբրեւ վիրավորանք կամ խայտառակություն: Օրինակ նրանք չեն ների, եթե երեկոյան կապուչինո պատվիրես, կամ ասենք պիցցան ուտես կետչուպով: Դա նույնն է, որ հայկական խորովածն ուտես թզի ջեմով կամ քյաբաբը՝ շոկոլադով: Իհարկե, զբոսաշրջիկների կողմից շատ այցելվող վայրերում որոշ ավանդույթներ վաղուց խախտվել են:
Գոհար ՀԱԿՈԲՅԱՆ
