«Ակնհայտ է, որ խաղաղության պայմանագրից դուրս ցանկացած համաձայնություն ՀՀ գործող իշխանությունների և Ադրբեջանի միջև էլ ավելի վտանգավոր է, քան բուն խաղաղության պայմանագիրը»,- դատարանի դահլիճում իր գործով դատական նիստից հետո լրագրողների հարցերին ի պատասխան ասաց ՀՀԿ փոխնախագահ Արմեն Աշոտյանը։
Հիշեցնենք՝ այսօր՝ ՀՀ կառավարության նիստի ժամանակ չզեկուցվող հարցերի թվում կառավարությունը հաստատեց «Հայաստանի Հանրապետության եւ Ադրբեջանի Հանրապետության միջեւ պետական սահմանի սահմանազատման եւ սահմանային անվտանգության հարցերով հանձնաժողովի ու Ադրբեջանի Հանրապետության եւ Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին» օրենքի նախագիծը։ Այն ուղարկվել է ՍԴ։
Արմեն Աշոտյանը հիշեցրեց՝ տեսանք՝ Արցախի հարցը որոշեցին հանել պայմանագրից, Արցախը կորցրինք, որոշեցին սահմանազատման գործընթացը խաղաղության պայմանագրից դուրս հանել, հիմա Կիրանցի կորուստները շարունակվելու են։ Հիմա խոսում են Զանգեզուրի միջանցքը իբր թե հանելու մասին չակերտավոր այդ պայմանագրից, ինչը նույնպես շատ ավելի վտանգավոր է, քան բուն խաղաղության պայմանագիրը։
Դիտարկմանը՝ Փաշինյանը նախընտրական արշավ է սկսել, արդյոք նա կհաջողի՞, Արմեն Աշոտյանն արձագանքեց․ «Եթե ես ունենայի հմտություններ ապագան տեսնելու՝ այն էլ այս պահին ու այսքան աղոտ ապագան, գուցե շատ բաներից հնարավոր լիներ խուսափել։ Բայց գործընթացները հուշում են, որ պետք չի լինել կոֆեի բաժակ նայող հասկանալու համար, որ Նիկոլի հնարավոր վերարտադրությունը խաչ է քաշելու ՀՀ պետականության վրա։ Չպետք է հասնել մինչև 2026 թվական։ Եթե Նիկոլի վարչապետությամբ գնացինք ընտրությունների, ազգովի ամբողջ աշխարհի դեմ խայտառակ ենք լինելու, ռիսկ կա, որ կրկին պիտակավորվելու ենք՝ որպես անթասիբ ազգ»։
Կարդացեք նաև
Տաթև ՀԱՐՈՒԹՅՈՒՆՅԱՆ
