Այսօր Երեւանի ընդհանուր իրավասության քրեական դատարանի Շենգավիթ նստավայրում՝ դատավոր Ժորա Չիչոյանի նախագահությամբ, շարունակվեց ՀՀ արտաքին գործերի նախարար Արարատ Միրզոյանին ծեծի ենթարկելու գործով հերթական դատական նիստը: Գործով տուժող՝ ԱԳ նախարարը ապահովության համար դատարան մտավ շենքի հետնամուտքից ու նիստն ընթանում է դռնփակ։ Հիշեցնենք, որ Արարատ Միրզոյանը ծեծի է ենթարկվել 2020թ. նոյեմբերի 9-10-ի գիշերը, այն օրը, երբ Նիկոլ Փաշինյանը ստորագրեց եռակողմ հայտարարությունը:
Այս գործով միակ մեղադրյալ Թորգոմ Ասատրյանի հայրը՝ Ասատուր Ասատրյանը լրագրողների հետ զրույցում նշեց, որ որդու խափանման միջոցը փոխվել է տնային կալանքի, քանի որ գործով 10 վկան արդեն ցուցմունք են տվել։ «Այդ օրը ես ԱԺ շենքի ներսում էին, տղաս եկավ՝ որդիական պարտքը կատարեց։ Նա իմ մոտ էր կանգնած, իսկ երբ Արարատ Միրզոյանին ծեծում էին, մեկը հարվածում էր նրան, որը ժիլետ էր հագել։ Թորգոմն էլ էր ժիլետ հագել այդ օրը»,-նշեց մեղադրյալի հայրը։ Նրա խոսքով՝ մեղադրող կողմը ասում է, որ հնարավոր է՝ այդ տղան Թորգոմն է։ Վերջինս մեղքը չի ընդունում։
«Արարատ Միրզոյանի հետ առերեսում չի եղել։ Սա առաջին անգամ է, որ դատարանում հանդիպելու են։ Լավ կլիներ, որ դռնբաց լիներ նիստը՝ բոլորը տեսնեին, իմանային ինչ է կատարվում»,-նշեց Ասատուր Ասատրյանը։
Կարդացեք նաև
Մանրամասները տեսանյութում։
Արմեն ԴԱՎԹՅԱՆ
