Ֆրանսիայի իշխանությունները իրենց քաղաքացիներին, այդ թվում՝ երկքաղաքացիություն ունեցող անձանց, հորդորել են զերծ մնալ դեպի Ադրբեջան ցանկացած տեսակի այցերից։
«Ֆրանսիայի քաղաքացիները, այդ թվում՝ երկքաղաքացիություն ունեցող անձինք, Ադրբեջանի տարածքով ճանապարհորդելիս հայտնվում են ձերբակալվելու վտանգի առջև։ Այս վտանգը սպառնում է անգամ այն անձանց, որոնք պարզ զբոսաշրջային այց են կատարում կամ գործնական այցով են գտնվում Ադրբեջանում։ Չկան երաշխիքներ, որ նրանց ձերբակալության դեպքում մարդու հիմնարար իրավունքները կհարգվեն»,- նշված է Ֆրանսիայի ԱԳՆ տարածած հաղորդագրությունում։
Ադրբեջանի արտգործնախարարությունը դատապարտել է Ֆրանսիայի դիվանագիտական գերատեսչության հայտարարությունը, որով պաշտոնական Փարիզը կոչ է անում երկրի քաղաքացիներին զերծ մնալ Ադրբեջան այցելություններից՝ կամայական ձերբակալություններից խուսափելու համար։
«Վճռականորեն դատապարտում ենք Ֆրանսիայի Եվրոպական հարցերի և արտաքին գործերի նախարարության հայտարարությունը», – APA գործակալության փոխանցմամբ՝ այսօր հայտարարել է Ադրբեջանի ԱԳՆ խոսնակ Այխան Հաջիզադեն: Նրա խոսքով՝ «Ֆրանսիայի նման անհիմն ու կողմնակալ որոշումը վկայում է այն մասին, որ այդ երկիրը ցանկանում է է՛լ ավելի սրել հարաբերությունները Ադրբեջանի հետ»։
Կարդացեք նաև
