«Ծառայությունների ազատ առեւտրի, հիմնադրման, գործունեության եւ ներդրումների իրականացման մասին» համաձայնագրի վավերացումը կօժանդակի ԱՊՀ երկրներին օգտագործել իրենց ծառայությունների ոլորտների համեմատական առավելությունները, զարգացնել տնտեսական ինտեգրումը եւ խթանել կայուն տնտեսական աճը:
Փաստաթուղթը ստորագրվել է 2023 թվականի հունիսին Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի եւ Ուզբեկստանի միջեւ: ՀՀ էկոնոմիկայի նախարարի տեղակալ Սեւակ Միքայելյանի խոսքով համաձայնագիրը բխում է «Ազատ առեւտրի գոտու մասին» դեռեւս 2011 թվականին ստորագրված պայմանագրից: «Այս համաձայնագրով մենք ընդլայնում ենք այդ պայմանագրի շրջանակը եւ այն տարածում նաեւ ծառայությունների վրա»,- ընդգծել է զեկուցողը եւ հավելել, որ փաստաթղթի վավերացումը կնպաստի նշյալ ոլորտում ԱՊՀ ձեւաչափում ծավալվող փոխգործակցության հետագա զարգացմանը:
Համաձայնագրով նաեւ կարգավորվում են ծառայությունների անդրսահմանային առեւտուրը, ընկերությունների ստեղծման եւ գործունեության ոլորտը, մասնակից պետությունների տարածքներով ֆիզիկական անձանց տեղաշարժի եւ ժամանակավոր գտնվելու հետ կապված հարցերի շրջանակը, ինչպես նաեւ ներդրումային գործունեությունը:
Սեւակ Միքայելյանի տեղեկացմամբ համաձայնագրի հավելվածներով կարգավորվում են նաեւ ֆինանսական, հեռահաղորդակցության ոլորտներում ծառայությունների առեւտրի առանձնահատկությունները:
Կարդացեք նաև
Նշվել է, որ ԱՊՀ գործադիր կոմիտեի գնահատականների համաձայն` կանխատեսվում է, որ համաձայնագրի կիրարկումն ԱՊՀ տարածքում ծառայությունների առեւտուրը կավելացնի 25 տոկոսով:
««Ծառայությունների ազատ առեւտրի, հիմնադրման, գործունեության եւ ներդրումների իրականացման մասին» համաձայնագիրը վավերացնելու մասին» հարցը քննարկվել է Տնտեսական հարցերի մշտական հանձնաժողովի` սեպտեմբերի 4-ի նիստում եւ ստացել դրական եզրակացություն:
ԱԺ
