Արտաքին գործերի փոխնախարար Մնացական Սաֆարյանին այսօր լրագրողները հարց ուղղեցին՝ ՀՀ ինքնիշխանության սկզբունքը չի՞ խախտվի, եթե Սյունիքով անցնող ճանապարհը վերահսկի միջազգային պահնորդական ընկերությունը, ինչի հնարավորության մասին խոսել է Նիկոլ Փաշինյանը։
«Ոչ, իհարկե, դա կախված է մանրամասներից, ուղղակի ընկերությունը կարող է սպասարկել։ Խոսվել է միայն դրա հնարավորության մասին, մանրամասները, դետալները դեռ չեն քննարկվել, հավելյալ տեղեկատվություն չկա։ Խաղաղության խաչմերուկի տրամաբանությունը, մանրամասները քաջ հայտնի են հանրությանը»,- պատասխանեց Սաֆարյանը։
Հիշեցնենք, որ Նիկոլ Փաշինյանն իր վերջին ասուլիսում ասել էր, որ Հայաստանը պատրաստ է ճանապարհ տրամադրել Նախիջևանի հետ Ադրբեջանի կապն ապահովելու համար։ Փաշինյանը նաեւ ասել էր, որ ճանապարհը կարող են վերահսկել լիցենզավորված միջազգային պահնորդական կազմակերպությունները։
Մնացական Սաֆարյանը հավատացրեց, որ միջազգային պահնորդական կազմակերպություն ներգրավելու դեպքում հայ սահմանապահները եւ մաքսավորները նույնպես աշխատանք իրականացնելու են այդ ճանապարհին։
Կարդացեք նաև
Հարցին, թե ի՞նչ չհամաձայնեցված հարցի մասին է խոսում Նիկոլ Փաշինյանը, երբ ասում է, որ խաղաղության պայմանագրի նախագծում չհամաձայնեցված հարց կա, Մնացական Սաֆարյանը պատասխանեց․ «Ես վարչապետի ասածին որեւէ բան ավելացնելու կամ պակասեցնելու չունեմ։ Եթե հավելյալ բան լինի տեղեկացնելու, կասենք։ Մենք Ադրբեջանին փոխանցել ենք 10-րդ տարբերակը, իրենք կպատասխանեն, ըստ դրա մենք կտանք մեր մեկնաբանություններն ու առաջարկը»։
Ռոզա ՀՈՎՀԱՆՆԻՍՅԱՆ
