«Կորցնում ենք ժամեր, բայց մեզ համար ամեն րոպեն է կարևոր, որովհետև շատ կարճ ժամանակից լինելու է խափանման միջոցի հարցի քննարկումը, և պարզ է բոլորի համար, որ մեր և իրավունքի շահն այն է, որ մենք ավարտենք գոնե առաջին վկայի հարցաքննությունը։ Եվ այլ գործոնների հետ, երբ գումարվում է այս գործոնը, դա արդեն հղի է անցանկալի հետևանքներով։ Հետևանքները կարող են այն լինել, որ մենք ուղղակի կարող ենք չհասցնել»,-Արմեն Աշոտյանի գործով դատական նիստից հետո լրագրողների հետ ճեպազրույցում ասաց Արմեն Աշոտյանի պաշտպան Ռուբեն Մելիքյանը։
Փաստաբանն ասաց՝ փաստեցինք, որ հերթական անգամ Արմեն Աշոտյանի՝ դատական նիստից ուշացումները անձնական գործոն չէ․ «Այնպես չէ, որ նրան ուղեկցողները չարամտություն են դրսևորում կամ ոչ պատշաճ վարքագիծ։ Սա բավական տարածում ունեցող հարց է։ Նիստերը բավականին ինտենսիվ են նշանակված, հնարավոր է՝ հասցնենք ավարտել առաջին վկայի հետ, բայց դա երաշխավորված համարել չենք կարող»։
Անդրադառնալով այն հարցին, որ Արմեն Աշոտյանի մասով գաղտնի քննչական գործողությունների հետ կապած հարցումը, որը դեռևս երկու ամիս առաջ բավարարվել էր, դեռ չի կատարվել, Ռուբեն Մելիքյանն ասաց․ «Սա շատ ավելի հեռուն գնացող խնդիր է։ Համակարգային առումով պետք է հարցին նայել։ Ձեռնպահ կմնամ ասել, որ դատավորի կողմից միտում եմ տեսնում, բայց սա արդեն անհանգստացնող է»։
Լրագրողների հարցին՝ այնուամենայնիվ, այս գործն ինչի՞ մասին է, Ռուբեն Մելիքյանը պատասխանեց․ «Մեր բոլոր այն քաղաքացիներին, որոնք ուզում են իսկապես հասկանալ՝ ինչի մասին է խոսքը, հորդորում եմ՝ թող դեպի Սևան գնալուց Ծովասար համալիրը մտնեն, որը Բժշկականը գնել է, Բժշկականի սեփականությունն է։
Կարդացեք նաև
Մյուսն էլ Մեդունու շենքն է։ Թող համեմատեն, տեսնեն՝ համեմատելու եզր կա՞, թե՝ ոչ։ Սա այն դեպքերից է, երբ Արմեն Աշոտյանի մասին չէ միայն խոսքը։ Այն մարդիկ, որոնք այս գործարքն արել են, ոչ թե պետք է մեղադրյալի աթոռին նստեին, այլ պարգևատրվեին, քանի որ արել են շատ ձեռնտու գործարք Բժշկականի համար։ Բժշկականը ձեռք է բերել սեփականություն, որը ոչ մեկ նրանից վերցնել չի կարող։ Լուծել են իրենց աշխատողների հանգստի խնդիրը։ Գնացեք, տեսեք, Մեդունին վերանորոգվող շե՞նք է, թե՝ ոչ»։
Տաթև ՀԱՐՈՒԹՅՈՒՆՅԱՆ
