«Հիմնական ուղերձը պարզ է․ Արցախը կա՝ անկախ նրանից, որ այնտեղ այս պահին հայեր չեն ապրում, և Արցախը հայաթափել են միայն ֆիզիկական իմաստով։ Արցախը կկորցնենք այն պահին, երբ Արցախը հայաթափվի մեր սրտում, հոգում, երբ մոռանանք Արցախի մասին»,- դատական նիստերի դահլիճում իր գործով դատական նիստի ավարտից հետո լրագրողների հարցերին ի պատասխան ասաց ՀՀԿ փոխնախագահ Արմեն Աշոտյանը։
Լրագրողները նկատեցին՝ իշխանությունները սեպտեմբերի 2-ին՝ Արցախի անկախության օրը տարօրինակ լռություն պահպանեցին, Արմեն Աշոտյանն արձագանքեց․ «Չեմ կարծում, որ տարօրինակ լռություն էին պահում։ Նրանք ամենօրյա ռեժիմով ամեն ինչ անում են, որ քողարկեն իրենց դավաճանական քաղաքականությունը և Արցախի հանձնումը ֆիզիկական իմաստով հասցնեն տրամաբանական ավարտին՝ մեր բնակչությանն էլ սրսկելով այն թունավոր, ապազգային միտքը, որ Արցախը մերը չէր և մեզ պետք էլ չէր»։
Հարցին՝ Դուք ինչո՞վ եք խանգարում Նիկոլ Փաշինյանին, որ շարունակում եք մնալ կալանավորված, Արմեն Աշոտյանն այսպես պատասխանեց․ «Էդ հարցը ասուլիսներին Նիկոլին տվեք, էլի»։
Արմեն Աշոտյանն ասաց, որ շնորհակալ է բոլոր այն մարդկանց, որոնք մինչև հիմա իր և իր ընտանիքի կողքին են, շնորհակալ է պայքարը շարունակող տասնյակ հազարավոր մեր հայրենակիցներին։
Կարդացեք նաև
Տաթև ՀԱՐՈՒԹՅՈՒՆՅԱՆ
