«Հանրակրթության մասին» օրենքում փոփոխությունները վերաբերում են դպրոցների կառավարմանը եւ ուսուցիչների ատեստավորման գործընթացին:
ՀՀ կրթության, գիտության, մշակույթի եւ սպորտի նախարար Ժաննա Անդրեասյանի խոսքով` 2021 թվականից փորձարկվել եւ իրականացվել է կամավոր ատեստավորման գործընթացը: Այս տարի մեկնարկելով հերթական ատեստավորման գործընթացի բարեփոխման աշխատանքները՝ անհրաժեշտություն է առաջացել օրենքում հստակեցնել մասնավորապես ատեստավորման արդյունքով ուսուցչի հետ հետագա աշխատանքային գործունեության կազմակերպման հարցերը:
Նախաձեռնությամբ հստակեցվում է, որ ուսուցչի ատեստավորումը համարժեք է գործատուի կողմից աշխատողի մասնագիտական ունակությունների համապատասխանության գնահատմանը:
Կարդացեք նաև
Գործադիրը խմբագրել է ուսուցիչների ատեստավորման դրույթներին վերաբերող հոդվածը՝ նպատակ ունենալով հստակեցնել հերթական եւ կամավոր ատեստավորման գործընթացների տարբերակումը: «Նման հստակեցումները կօգնեն, որ մենք թե՛ ուսուցիչների համար կանխատեսելի ու տեսանելի եւ թե՛ օրենքի կիրարկման տեսանկյունից ավելի հստակ քաղաքականություն վարենք»,- ընդգծել է զեկուցողը եւ հավելել, որ առավել հստակեցվել են նաեւ ուսուցչի մասնագիտական զարգացման կարիքի գնահատմանը վերաբերող դրույթները: «Եթե ուսուցիչը գնահատվել է եւ ակնհայտ է, որ նա ունի առարկայական գիտելիքի խնդիր, ապա վերջինիս համար պարտադիր է դառնալու կամավոր ատեստավորման եղանակով կամ այլ կերպ ասած՝ առարկայական գիտելիքի ստուգման եղանակով ատեստավորման անցկացումը»,- նշել է գերատեսչության ղեկավարը:
Նախարարը կարեւորել է ոլորտում նոր չափորոշչի ներդրման գործընթացով պայմանավորված ուսուցչի աշխատաժամանակի փոփոխություններին առնչվող հստակեցումները:
Դպրոցների կառավարման մասով նախագծով սահմանվում է «մենթոր դպրոց» հասկացությունը: Ժաննա Անդրեասյանի տեղեկացմամբ այսօր էլ համակարգում կան դպրոցներ, որոնք առանձնանում են իրենց կարողությունների բարձր մակարդակով եւ աջակցում այլ դպրոցների՝ հանդիսանալով նաեւ վերապատրաստումների եւ խորհրդատվությունների կենտրոն:
Տնօրենների եւ համակարգողների մասով էլ ամրագրվել է քաղաքական զսպվածության անհրաժեշտությունը, այն է՝ տնօրենը եւ համակարգողն իրենց պաշտոնավարման ընթացքում պարտավոր են դրսեւորել քաղաքական զսպվածություն, իրենց պաշտոնեական դիրքը կամ աշխատանքային միջոցները չօգտագործել կուսակցությունների կամ հասարակական, այդ թվում` կրոնական միավորումների շահերի համար կամ նրանց նկատմամբ վերաբերմունք քարոզելու կամ իրենց պաշտոնական պարտականությունները կատարելիս այլ քաղաքական կամ կրոնական գործունեություն իրականացնելու համար:
Նշվել է, որ կառավարման մասով հստակեցվել են հավաստագրման հետ կապված դրույթները: Նախատեսվել է տնօրենների գործուղման հնարավորություն:
Նախաձեռնությամբ կատարվել են նաեւ մի շարք խմբագրական փոփոխություններ:
Ժաննա Անդրեասյանը պատասխանել է ոլորտում փոփոխությունների իրականացմանն առնչվող պատգամավորների հարցերին:
Հարակից զեկուցող, ԱԺ պատգամավոր Նարեկ Բաբայանի խոսքով՝ նախաձեռնության անհրաժեշտությունը բխում է նաեւ ՀՀ կառավարության ծրագրից, ինչպես նաեւ 2020-2050 թվականների Հայաստանի վերափոխման ռազմավարությունից:
Նախաձեռնությունն առաջին ընթերցմամբ քննարկվել է Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի՝ սեպտեմբերի 3-ի նիստում եւ ստացել դրական եզրակացություն:
ԱԺ
