«ԱքսելՄոնդրիան» ընկերության համահիմնադիր, գլխավոր գործադիր տնօրեն Շուշան Հարությունյանը «Re:arrange» փոդքաստի շրջանակում խոսել է մասնագիտական և քաղաքացիական արժեքների մասին: Մոտ 3 ժամ տևած և տասնյակ հազարավոր դիտումներ գրանցած հաղորդմանը հնչած մտքերից առանձնացրել ենք կրթությանն ու հաղորդակցության ոլորտին վերաբերող 5-ը:
1.«Խոսափողը պատասխանատվություն է: Ինտերնետում աղբ լցնելը, բովանդակություն ստեղծել, որը սանձարձակություն է հիշեցնում, ոչ մի կերպ կապ չունի ազատության հետ»:
2.«Կրթությունը հասարակական վերահսկողության լավագույն ու մինչև հիմա մտածված ամենահանճարեղ տարբերակն է, քանի որ օգնում է սոցիալական հարաբերություններում տեղաշարժվել նույն «նավիգացիոն» համակարգում: Առանց կրթության մարդիկ չէին կարող համագործակցել ու փոխանցել սերունդների հիշողությունը, գիտելիքն ու համակարգերը»:
3.«Երբ տեխնոլոգիան սոցիալական համաձայնությունից առաջ է ընկնում, հիմնականում չարիք է ստեղծում: Օրինակ, տեխնոլոգիական առաջընթացը ստեղծեց սոցիալական ցանցերը, որտեղ մարդկանց արտահայտվելու և առաջնային ինֆորմացիայի աղբյուր դառնալու միջոցները ազատականացվեցին: Արդյունքում՝ տեխնոլոգիան ավելացրեց աղբ, ստեղծեց հասարակական բևեռացում և դարձավ հարթակ, որտեղ մարդիկ այլևս իրար չեն լսում և ցանկանում են պատժել տեսակի տարբերությունը»:
4.«Որպես ինստիտուցիոնալ միավոր մեզ դժվար է մրցակցել անհատների հետ, ովքեր թափանցիկություն չունեն, հարկում չունեն, պատասխանատվություն չունեն և կարող են իրենց արկածախնդրություն թույլ տալ պատվիրատուների հաշվին: Ի հակառակ հանրային պատկերացումների, ստեղծարար ոլորտը քիչ փորձարարական է: Հաղորդակցական ոլորտում միայն 5 տոկոսն է ստեղծագործականություն, մնացածը հաշվարկ է և այն չափելի է»:
5.«Եթե մենք մտածենք հետևյալի մասին, որ այսօր ես ծառը տնկում եմ, հնարավոր է, որ իր ստվերի տակ ես դեռևս չհանգստանամ: Բայց միայն այն, որ այսօր ծառը տնկում եմ հաջորդ սերունդների համար, արդեն իսկ ազնվագույն առաքելություն է»:
Ամբողջական զրույցը.
Հիշեցնենք, որ «ԱքսելՄոնդրիան» ընկերությունը իր գրասենյակը Երևանում բացել է 2022-ից և հանրային կապերի, հեղինակության կառավարման և ստեղծարար հաղորդակցության ծառայություններ է մատուցում Հայաստանում առաջատար ընկերությունների համար: Ընկերության գլխավոր գործադիր տնօրեն Շուշան Հարությունյանը հաղորդակցական նախագծերի կառավարման 17 տարվա փորձառություն ունի, հանդիսանում է Կենտրոնական եվրոպական համալսարանի և Օքսֆորդի համալսարանի բիզնես դպրոցի շրջանավարտ: Նրա աշխատանքային փորձը ներառում է հանրային նշանակության նախագծերի իրականացում, արշավներ և բրենդինգներ` Հայաստանում, ԵՄ երկրներում և Մերձավոր Արևելքում:
Rearrange-ը հայալեզու առաջին ու ամենաշատ հետևորդներ ունեցող podcast-ն է, որը հեռարձակվում է ավելի քան 4 տարի` բիզնես խորհրդատու և ակտիվ քաղաքացի Նարեկ Ամիրխանյանի կողմից:
