ԱԺ պետաիրավական հարցերի մշտական հանձնաժողովի նիստում «Հայաստան» խմբակցության պատգամավոր Գեղամ Նազարյանը հարցրեց ՆԳՆ Միգրացիայի եւ քաղաքացիության ծառայության պետ Արմեն Ղազարյանին՝ Արցախից բռնի տեղահանված քանի՞ անձ է ստացել ՀՀ քաղաքացիություն, եւ ինչո՞ւ քաղաքացիության տրամադրման կարգը չի հեշտացվում։
«Մենք ամսի 30-ի դրությամբ ունենք Լեռնային Ղարաբաղից բռնի տեղահանված 4300-ից ավելի անձանց քաղաքացիության դիմումներ։ Շուրջ 3000 մարդու արդեն հանրապետության նախագահի հրամանագրով շնորհվել է ՀՀ քաղաքացիություն։ Այստեղ մի կարեւոր նկատառում պետք է հաշվի առնել՝ անչափահասները չեն դիմում քաղաքացիություն ստանալու, որովհետեւ ծնողներին քաղաքացիություն շնորհելուց հետո անձնագրի փոփոխությամբ անչափահասը դառնում է ՀՀ քաղաքացի»,- ասաց Արմեն Ղազարյանը։
Արմեն Ղազարյանն ասաց, որ արդեն իսկ գործում է դյուրացված կարգ։ «Քաղաքացիության մասին օրենքով սահմանված է 90 աշխատանքային օր՝ մոտ չորս ամիս, բայց Լեռնային Ղարաբաղից բռնի տեղահանված անձանց պարագայում միջինում գործընթացը տեւում է երկու ամիս։ Երկրորդ էական հանգամանքը, որ այս համակարգի պատմության ընթացքում ընդհանրապես այդպիսի բան տեղի չի ունեցել, մենք առաջին անգամ ենք կիրառում՝ բոլոր տարածքային մեր ստորաբաժանումները մարզերում ընդունում են քաղաքացիության դիմումներ։ Եվ դա էականորեն արագացնում է գործընթացը։ Հնարավորինս նաեւ արագացնում ենք գործընթացները․ եթե, օրինակ, ունենում են ծննդյան վկայականի խնդիր, արդարադատության նախարարության մեր գործընկերների հետ աշխատում ենք այդ խնդիրներն արագ ձեւով լուծել»,- նշեց Ղազարյանը։
Մանրամասները՝ տեսանյութում
Կարդացեք նաև
Ռոզա ՀՈՎՀԱՆՆԻՍՅԱՆ
