Այս պահին որպես առաջնահերթություն ենք հռչակում վերադարձի իրավունքի թեման օրակարգ մտցնելը՝ հետագայում արդեն սեղանի շուրջ քննարկելու այն բոլոր տարբերակներն ու հնարավորությունները, որոնք կարող են ժամանակի ընթացքում առաջանալ»,- այսօր լրագրողների հետ զրույցում ասաց Արցախի մարդու իրավունքների պաշտպան Գեղամ Ստեփանյանը։
«Ես ուզում եմ ձեզ համար եւս մեկ անգամ հստակ շեշտել, որ վերադարձի իրավունքը՝ առանց ինքնորոշման իրավունքի ճանաչման կամ դրա հետ փոխկապակցման, ուղղակի անհնար է։ Հակառակ պարագայում 5-6 օրվա ընթացքում չէինք ունենա դատարկված Արցախ։ Գնալ-ապրել Ադրբեջանի վերահսկողության տակ, ադրբեջանական ոստիկանության ներքո, ադրբեջանական բռնապետության ներքո, անիմաստ է դրա մասին խոսել»,- ասաց նա։
Գեղամ Ստեփանյանն ասաց, որ Արցախի ժողովուրդն ունի վերադարձի իրավունք, որն ամրագրված է ՄԱԿ-ի Արդարադատության միջազգային դատարանի որոշման մեջ։ Կա իրավունքը, եւ այդ իրավունքի իրացման համար պետք է գործադրվեն բոլոր ջանքերը։ «Հիմա շատերը կասեն՝ դա անիրատեսական է, ես չեմ ասում, որ հենց վաղը դա ի կատար է ածվելու, բայց ես անձամբ չեմ պատրաստվում հրաժարվել այն իրավունքից, որը նաեւ արձանագրվել է միջազգային դատական ատյանների կողմից։ Այսօր հնարավոր չլինի, վաղը, մյուս օրը, չեմ փակելու Արցախի թեման, մինչեւ որ կկարողանամ ինչ-որ ձեւով հասնել այդ իրավունքի իրացմանը»,- հավելեց նա։
Ըստ Ստեփանյանի՝ Ադրբեջանը փակել է արցախցիների վերադարձի թեման, քանի որ Հայաստանի իշխանությունն էլ է փակել այդ հարցը։
Կարդացեք նաև
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
