Եթե երբեւէ Արցախի հարցը փակված համարվի, դա նշանակում է, որ Հայաստանի Հանրապետության եւ ողջ հայության հարցը, հայկական հարցն ընդհանրապես փակված է։ Այս մասին այսօր Երեւանում Արցախի ներկայացուցչությունում լրագրողներին ասաց «Ժառանգություն» կուսակցության առաջնորդ Րաֆֆի Հովհաննիսյանը։
«Ես կարծում եմ, որ մենք Հայաստանի լեգիտիմ իշխանություն այլեւս չունենք։ Եվ քանի դեռ այս մարդը կա, չի լինելու Արցախի հարցի լուծում, չի լինելու ՀՀ ինքնիշխանություն»,- ասաց նա։
Անդրադառնալով Նիկոլ Փաշինյանի հայտարարություններին, որ Արցախ վերադառնալը իրատեսական չէ, Րաֆֆի Հովհաննիսյանն ասաց. «Այդ մարդուն չեմ մեկնաբանում, նշաձողի հարցն ինքն առաջարկեց, ինքը լուծեց, այդ կեղծ իրատեսականության ներքո ինքը փորձում է հիմա շրջանառության մեջ դնել հարցը, որ վերադարձը նույնպես նշաձողից ներքեւ է։ Ես համարում եմ, որ նոր իշխանության, նոր որակի հասարակության կայացման դեպքում հնարավոր է, իրատեսական է ժամանակի ընթացքում այնպես անել, որ Արցախը չդառնա հերթական Նախիջևան, եւ արցախցին վերադառնա Արցախ։ Եվ այն մարդը, որն ասում է՝ իրատեսական չէ, ինքը վարչապետ չէ, ինքը Հայաստանի ներկայացուցիչ չի կարող լինել, որովհետեւ իր ձեռքով է, որ մենք կորցրել ենք հազարավոր երիտասարդ հերոսների, մենք կորցրել ենք հայրենի եզերք եւ ժամանակավորապես հեռացել ենք Արցախից։ Իր հրամանատարության ներքո Հայաստանը պարտության տարավ։ Ձեւականություն է հղում կատարել Արցախի լուծարման որեւէ փաստաթղթի, պարզ է, որ ինքն ի սկզբանե իրավական ուժ չունի։ Դրա բացատրությունն արդեն տրվել է»։
Մանրամասները՝ տեսանյութում
Կարդացեք նաև
Ռոզա ՀՈՎՀԱՆՆԻՍՅԱՆ
