«Նկատելի է, որ այսպես կոչված խաղաղության պայմանագրի շուրջ կուլիսներում լուրջ քննարկումներ են ընթանում։ Պատահական չէ, որ նույնիսկ Ադրբեջանն է հայտարարում, որ պայմանագրի փաստաթուղթն է այս պահին պատրաստում կամ մոտ է դա ավարտին»,-ՀՀԿ փոխնախագահ Արմեն Աշոտյանի գործով դատական նիստից առաջ լրագրողների հետ զրույցում ասաց ՀՀ ԱԺ «Պատիվ ունեմ» խմբակցության պատգամավոր Տիգրան Աբրահամյանը։
Ըստ նրա՝ թեև վերջին երկու ամիսների ընթացքում ՀՀ-Ադրբեջան հարաբերություններում թվացյալ դադար է, բայց իրականում նա համարում է, որ կուլիսներում բավականին ակտիվ գործընթացներ են իրականացվում, ինչը հատկապես տեսանելի է միջազգային տարբեր դերակատարների հայտարարություններից, որոնք որևէ ձևով առնչվում են այս գործընթացին։
Տիգրան Աբրահամյանն ասաց՝ տպավորություն ունի, որ հատկապես արտաքին ուժերի ճնշմամբ ամեն գնով փորձ է արվում պատրաստել փաստաթուղթ, որի մեջ նպատակներ, ցանկություններ կլինեն, բայց հիմնական խնդիրները, որոնք վերաբերում են հայ-ադրբեջանական օրակարգին, կմնան դրսում։
Ըստ պատգամավորի՝ ՀՀ Սահմանադրության հարցը ՀՀ-ի և Ադրբեջանի իշխանությունների միջև գլխավոր խնդիրը չէ․ «Մի իշխանություն, որը հանձնել է Արցախը, որևէ խնդիր չունի Սահմանադրության մեջ վերացնելու բոլոր այն բաղադրիչները՝ կվերաբերեն Սահմանադրության տեքստին կամ նախաբանին, որը որևէ ձևով առնչվում է Արցախի հարցին կամ այդ հարցի՝ բաց մնալուն։ Այնպես որ, ես չեմ կարծում, որ ՀՀ-ի և Ադրբեջանի իշխանությունների միջև գլխավոր խնդիրն է սա։ ՀՀ-ի և Ադրբեջանի իշխանությունները խաղարկում են այս թեման՝ ներկայացնելով որպես հիմնական խնդիր»։ Տիգրան Աբրահամյանի կարծիքով՝ խնդիրներն ավելի շատ կապված են սահմանային ճշգրտումների հետ։
Կարդացեք նաև
Տաթև ՀԱՐՈՒԹՅՈՒՆՅԱՆ
