Այսօր արդարադատության փոխնախարար Արմենուհի Հարությունյանը ԱԺ աշխատանքի եւ սոցիալական հարցերի հանձնաժողովի նիստում ներկայացրեց «ՀՀ աշխատանքային օրենսգրքում» փոփոխությունների եւ լրացումների նախագիծ, որով առաջարկում են սահմանել, որ հարկադիր պարապուրդի ժամանակահատվածում աշխատողի՝ այլ գործատուի մոտ աշխատանքի անցնելու դեպքում վարձատրվելու է նախկին աշխատանքի համար վարձատրվող աշխատավարձի չափով 9 ամսվա գումար: Իսկ եթե 9 ամսից պակաս է հարկադիր պարապուրդում եղել` տվյալ ժամանակահատվածի գումարը:
Փոխնախարարն ասաց, որ գործող օրենսդրությամբ հնարավորություն կար հարկադիր պարապուրդը հաշվարկել մինչեւ դատական ակտի ուժի մեջ մտնելը: Սակայն փաստացի այդ գործընթացը այնքան երկար է տեւում, որ քաղաքացին ոչ թե մնում է հարկադիր պարապուրդում, այլ անցնում է այլ աշխատանքի, երբեմն ավելի լավ վարձատրվող ու միաժամանակ համարվում է հարկադիր պարապուրդում գտնվող: Հիմա եթե կպարզվի, որ հարկադիր պարապուրդում մարդը անցել է ավելի ցածր աշխատավարձով աշխատանքի, տարբերությունը աշխատավարձերի նույնպես պետք է վճարվի:
Կարդացեք նաև
«Հայաստան» խմբակցության պատգամավոր Աղվան Վարդանյանն ասաց. «Մենք վերջին տարիներին ունեցել ենք իրավիճակ, երբ տասնյակ, եթե ոչ հարյուրավոր դեպքերում աշխատանքից անօրինական ազատումներ են տեղի ունեցել, այն աշխատողները, որոնք գիտակցել են իրենց իրավունքների խախտումները, դիմել են դատարան, առաջին ատյանի դատարանը մեկ տարի, երկրորդ ատյանը՝ 2 տարի…Դատարանների վճիռներից հետո մարդկանց վճարվել է 5-6 տարիների աշխատավարձ: Եթե պետական մարմինները առաջին ատյանի վճիռներից հետո հասկանային, գիտակցեին, որ խախտումներ են թույլ տվել ու չդիմեն Վերաքննիչ դատարաններ, պետությունը կտուժեր 2-3 մլն, բայց համառորեն դիմում են Վերաքննիչ, Վճռաբեկ ու մարդիկ վճարվում են տասնյակ միլիոններ: Շատ ավելի տրամաբանական կլիներ, եթե նախարարությունը նաեւ սա կարգավորեր: Այդ գերատեսչությունների ղեկավարները, որոնք պետությանը վնաս են տալիս տասնյակ միլիոններ, պետք է հատուցեին իրենց պարգեւատրումների հաշվին»:
Փոխնախարարը պատասխանեց, որ իսկապես բազմաթիվ են նման դեպքերը ոչ միայն իրենց նախարարությունում, այլեւ ամբողջ պետական համակարգում ու իրենք մտածում են. «Բնական է, վարչարարությունը ստատիկ չի ու կարող է դատարանը որոշել, որ ճիշտ որոշումներ չեն կայացրել: Եթե առկա է դատական ակտ, որով անձը անօրինական է ազատվել աշխատանքից, բնական է, որ այդ անձը պետք է անպայման ստանա իր հատուցումը»:
Աղվան Վարդանյանը խնդրեց վիճակագրություն ներկայացնել՝ վերջին 6 տարիների ընթացքում քանի՞ դեպք է արձանագրվել անօրինական աշխատանքից ազատումների: Փոխնախարարն ասաց, որ դատական դեպարտամենտից պետք է խնդրեն տվյալներ, ուստի այդ վիճակագրությունը կարող է ներկայացնել ավելի ուշ:
Հռիփսիմե ՋԵԲԵՋՅԱՆ
