Սեպտեմբերի 1-ին ընդառաջ, ամբողջությամբ իրականացվել է նոր դասագրքերի տպագրությունը. այսօր կայացած կառավարության նիստում հայտարարեց ԿԳՄՍ նախարար Ժաննա Անդրեասյանը:
«Կարծում եմ, որ այս տարի, ի տարբերություն նախորդ տարվա, մենք ժամանակային որեւէ ձգձգում չենք ունենա։ Արդեն իսկ դասագրքերի մեծ մասը դպրոցներում են, մնացածը կհասնի մինչեւ այս շաբաթվա վերջ եւ սեպտեմբերի 1-ից ողջ փաթեթով կկարողանանք դասապրոցեսն իրականացնել։ Կարծում եմ, որ այս իմաստով ուսումնական տարին հաջող սկսելու որևէ խոչընդոտ չունենք»,- ասաց նախարարը:
Փոխվարչապետ Տիգրան Խաչատրյանն էլ հավելեց, որ սեպտեմբերի 1-ին շահագործման կհանձնվի 7 նորակառույց դպրոց։
Ընդհանուր առմամբ, ըստ նրա, 210-ից ավել նոր դպրոցներ է կառուցել գործող կառավարությունը:
Կարդացեք նաև
Վարչապետ Նիկոլ Փաշինյանը խոսեց վերահսկողության մասին, ասաց՝ կառավարության ներկայացուցիչները պետք է գնան եւ տեսնեն՝ ի՞նչ է կատարվում դպրոցներում, թե ներսում, թե դրսում, լսեն ուսուցիչների եւ աշակերտների կարծիքը. «Ի՞նչ բացթողումներ, դիտողություններ կան, ի՞նչ դրական ուղղություններ կան, դրականն էլ է մեզ պետք»:
Փոխվարչապետն ու վարչապետը խոսեցին այն մասին, որ շենքի կառավարման ուղեցույց պետք է լինի, որին նաեւ դպրոցների տնօրենները պետք է տիրապետեն, որպես գույքի կառավարիչներ: Նիկոլ Փաշինյանն առաջարկեց տնօրենների ընտրության չափանիշներում մի տողով էլ ամրագրել, որ տնօրենի հավակնորդը պետք է տեղյակ լինի դպրոցի կառավարման ուղեցույցին:
Մանրամասները՝ տեսանյութում
«Դպրոցը կրթական, էսթետիկական միջավայր է, որը պարտադիր պետք է տեղի ունենա»,- ասաց նա՝ հավելելով, որ կներդրվեն նաեւ դպրոցի ինտերիերի ձեւավորման չափանիշներ:
«Մենք մեր բոլոր հին ու նոր խնդիրները տանում ենք՝ կապում ենք երեխեքի վզից»,- վրդովվեց նա՝ դժգոհելով նոր կառուցված դպրոցներում հին եւ մաշված գույքի առկայությունից:
Ժաննա Անդրեասյանն էլ դժգոհեց դպրոցական աթոռների ծանրությունից
Հետո երկար խոսվեց դպրոցների՝ «գունեղ» լինելու անհրաժեշտության մասին, «ժանգոտ ցանկապատերից» ազատվելու մասին:
Նիկոլ Փաշինյանը հարցին ավելի լայն անդրադարձավ. «Քաղաքացու ցանկապատն էլ չպիտի լինի ժանգոտ, որովհետեւ դա վերաբերմունք է միջավայրին, բնակավայրին: Եթե պետությունը 8 միլիարդի ներդրում է անում, քաղաքացին էլ պիտի 8 հազար դրամի ներդրում անի, հարեւաններով որոշեն, որ այս ցանկապատները պետք է իքս գույնի լինի»:
Նիկոլ Փաշինյանը խոսեց համայնքի, համակեցության եւ, որպես հետեւանք, ազգային միասնության մասին էլ՝ ասելով, որ ձմռանը մարդն իր դռան դիմաց ընկնում է, ոտքը կոտրում ու անմիջապես ուղիղ եթեր է մտնում՝ կառավարության «հերն անիծում». «Եղբայր, քո տան դռան դեմը դու պիտի մաքրես»:
Մանրամասները՝ տեսանյութում
Նելլի ԳՐԻԳՈՐՅԱՆ
