«Հիմա Ձեր ճառը ներկայացրեք, հետո Ձեզ հնարավորություն կտրվի ներկայացնել Ձեր միջնորդությունները»,- Երևանի ընդհանուր իրավասության քրեական դատարանում ՍԴ նախկին նախագահ, ՍԴ դատավոր Հրայր Թովմասյանի գործով դատական նիստի ընթացքում հայտարարեց նախագահող դատավոր Տաթևիկ Գրիգորյանը՝ թույլ չտալով Հրայր Թովմասյանի պաշտպան Արամ Օրբելյանին դատարանին ինքնաբացարկի միջնորդություն ներկայացնել։
Արամ Օրբելյանն ասաց․ «Իմ ճառը չեմ ավարտելու այսօր, տևելու է մոտ երեք դատական նիստ, որովհետև կազմված է մոտ 600 էջից, և դատարանը դա սահմանափակելու հնարավորություն չունի»։
Դիմելով դատավորին Արամ Օրբելյանն ասաց՝ բացարկի միջնորդությունն անհապաղ քննարկվող միջնորդություն է, իսկ դատավոր Տաթևիկ Գրիգորյանը հակադարձեց՝ դատարանը կարգ է սահմանել, և հիմա պետք է ներկայացնել պաշտպանական ճառը։
Կարդացեք նաև
Տաթևիկ Գրիգորյանը նաև հայտնեց՝ դատարանը հետևյալ դիրքորոշումն ունի՝ չնայած կրկին դատական սանկցիային համարժեք է եղել Հրայր Թովմասյանի դրսևորած վարքագիծը, սակայն դատարանը նրան հնարավորություն է տալու պաշտպանական ճառով հանդես գալ։
Տաթև ՀԱՐՈՒԹՅՈՒՆՅԱՆ
