«Նախորդ շաբաթ տված հանձնարարականը ոչ ամբողջությամբ է կատարվել, այսինքն՝ բոլոր այն զեկույցները, որ պետք է ներկայացվեին այսօր գործակարգավարական խորհրդակցության ընթացքում, ոչ ամբողջական ենք ստացել: Եվ եթե հաջորդ շաբաթվանից նույնը կրկնվի, կսկսենք գնալ նկատողությունների ճանապարհով, անհատական բարձրաձայնելով»,- Երեւանի քաղաքապետարանի գործակարգավարական խորհրդակցության ժամանակ ասաց Երևանի քաղաքապետ Տիգրան Ավինյանը՝ ի թիվս այլնի անդրադառնալով քաղաքացիների հարցումների հետ կապված քաղաքապետարանի արձագանքին:
Նրա խոսքով. «Ակտիվ քաղաքացի» հարթակում ունեն հանձնարարականներ, որոնք բացվել են ապրիլ-մայիս ամիսներին, դրանց վերաբերյալ որեւէ արձագանք չունեն. «Ունենք 15 օր բոլոր այդ հին հարցերին որեւէ պատասխան-արձագանք տալու համար:
Դրանից հետո խաղի կանոնը հետեւյալն է՝ քաղաքացին որեւէ խնդիր բարձրաձայնեց այդ հարթակով, մենք ունենք ընդամենը երեք օր՝ պատասխանի համար: Մենք պետք է մարդուն պատասխան տանք՝ փոսալցման աշխատանք է, թե մի այլ աշխատանք, երբ է ավարտվելու: Քաղաքացին մեզանից երեք օրվա ընթացքում պետք է իմանա, թե ինչ է տեղի ունենալու, արդյոք խնդիրը լուծվել է կամ ինչ ժամկետում է լուծվելու: Մենք երեք օրից ավել ժամանակ չունենք քաղաքացուն պատասխան տալու»:
Միեւնույն ժամանակ Ավինյանը հավելեց. «Բայց դա չի նշանակում, որ, օրինակ, ամբողջ բակի բարեկարգումը 3 օրում պետք է ավարտենք: Բայց քաղաքացին պետք է իմանա, թե երբ պետք է անենք: Այս դեպքում՝ մեր տրված պատասխանն էլ դառնում է մեր աշխատանքի ծրագիրը»:
Կարդացեք նաև
Գոհար ՀԱԿՈԲՅԱՆ
