Այսօր Գեղարքունիքի մարզի ընդհանուր իրավասության առաջին ատյանի դատարանը երեք ամսով երկարացրել է գյումրեցի ընդդիմադիր քաղաքական գործիչ, նախկին իրավապաշտպան Կարապետ Պողոսյանի տնային կալանքի ժամկետը՝ անփոփոխ թողնելով 2000000 դրամ գրավը։
Կարապետ Պողոսյանի կինը՝ Անգին Մալխասյանն Aravot.am-ի հետ զրույցում տեղեկացրեց, որ նրա փաստաբանները՝ Արտակ Նավասարդյանն ու Սլավիկ Պողոսյանը, պատրաստվում են բողոքարկել դատարանի որոշումը, քանի որ որևէ իրավական հիմք չկա կալանքը երկարացնելու։
«Մեկ անգամ ևս ապացուցվեց, որ քաղաքական հետապնդում են իրականացնում ամուսնուս նկատմամբ, քաղաքական ճնշումներ են գործադրում՝ նենգ վրեժխնդրությամբ»,-ասաց Անգին Մալխասյանը։
Հիշեցնենք, որ հուլիսի 30-ին Կարապետ Պողոսյանի նկատմամբ ՀՀ քրեական օրենսգրքի 396-րդ հոդվածի 1-ին մասով, այն է՝ «Թմրամիջոցների, հոգեմետ (հոգեներգործուն) նյութերի, դրանց պատրաստուկների կամ դրանց համարժեք նյութերի (անալոգի) կամ դրանց ածանցյալների կամ պրեկուրսորների ապօրինի շրջանառությունն առանց իրացնելու նպատակի) հարուցված հանրային քրեական հետապնդումը դադարեցվել էր, քանի որ անձը չէր կատարել իրեն մեղսագրվող արարքը։
Կարդացեք նաև
Ըստ փաստաբանների տարածած հաղորդագրության․ «2024 թվականի հուլիսի 31-ի քրեական վարույթով հսկող դատախազի որոշմամբ Կարապետ Պողոսյանի նկատմամբ հարուցվել է նոր հանրային քրեական հետապնդում՝ ՀՀ քրեական օրենսգրքի 297-րդ հոդվածի 2-րդ մասի 3-րդ կետով՝ (խուլիգանությունը, որը կատարվել է տեղեկատվական կամ հաղորդակցական տեխնոլոգիաներն օգտագործելով), որով, որով, ըստ էության, վերաշարադրվել է արդեն իսկ հարուցված հանրային քրեական հետապնդման ձևակերպումը։
Տվյալ քրեական վարույթով հայտնվել է նախաքննության ավարտ՝ մեղադրական եզրակացություն կազմելով, որին կհետևի վարույթի նյութերը դատարանին հանձնելը»։
Կարապետ Պողոսյանի կնոջ տեղեկացմամբ, օգոստոսի 28-ին նշանակված է դատական նիստ։
Անգին Մալխասյանը ամուսնուն թմրամիջոցներ, հոգեմետ դեղեր պահելու կամ օգտագործելու մեջ մեղադրելը համարել էր նրան վարկաբեկելու, անունը սևացնելու ու անմեղության կանխավարկածը խախտելու ակնառու փորձ։
Նունե ԱՐԵՎՇԱՏՅԱՆ
