Կառավարության այսօրվա նիստից հետո էկոնոմիկայի նախարար Գեւորգ Պապոյանն անդրադարձավ ռուսական շուկայում վաճառվող հայկական կոնյակի վերաբերյալ հայտարարություններին։
Հիշեցնենք, որ «Անտիկոնտրաֆակտ» ասոցիացիայի եւ Ռուսաստանի կոնյակ, սպիրտ ու ալկոհոլային խմիչք արտադրողների միության համատեղ հետազոտության արդյունքում՝ ՌԴ-ում վաճառվող հայկական կոնյակի գրեթե 90%-ն անվտանգ չէ, իսկ արտադրանքի գրեթե 50%–ը պարունակում է ոչ ալկոհոլային սպիրտ, որը չպետք է լինի կոնյակի մեջ։
«Հայկական կոնյակի հետ կապված հարցերը դրանք պարզապես հարցեր չեն, որոնք պետք է վերաբերեն որեւէ երկրում, այդ թվում՝ Ռուսաստանում դրանց վաճառվել կամ չվաճառվելուն։ Հայկական կոնյակը բրենդ է, եւ մենք Եվրամիության ծրագրերից մեկի շրջանակներում հիմա աշխատում ենք բրենդի կայացման համար։ Իմ կարծիքով՝ մենք թերեւս 2025 թվականից պետք է գնանք հետեւյալ ճանապարհով։ Կդնենք պահանջ պարտադիր իզոտոպային լաբորատորիայի, այսինքն՝ Հայաստանից եթե որեւէ կոնյակի սպիրտ կարտահանվի, ապա ինքը կունենա լաբորատոր փորձաքննության փաստաթուղթ, որ, օրինակ՝ շվեյցարական այսինչ իզոտոպային լաբորատորիայում ինքն անցել է փորձաքննություն»,- ասաց նա։
Հարցին, թե քաղաքական միտում տեսնո՞ւմ է այս ամենում, Պապոյանն ասաց․ «Ես էկոնոմիկայի նախարարն եմ, իմ լիազորությունների շրջանակում պետք է ամեն ինչ անեմ, որպեսզի իմ նշած խնդիրները հենց այս մակարդակում լուծվեն»։ Ըստ նրա՝ այս պահին իրենք էկոնոմիկայի նախարարությունում բողոք չունեն տնտեսվարողներից, որ ՌԴ արտահանման հարցում խոչընդոտի են հանդիպել։
Կարդացեք նաև
Ըստ նրա՝ հայկական կոնյակի շատ մեծ տոկոսն արտահանվում է ՌԴ։ Պապոյանն ասաց, որ խնդրի մասին մամուլն է բարձրաձայնել, որպեսզի իրենք ճիշտ պատկերացում ունենան, պետք է պաշտոնական նամակագրություն ունենան ռուս գործընկերների հետ։ «Նման հարց քանի որ չի բարձրացվել, չի քննարկվել։ Երբ կլինի պաշտոնական արձագանք, մենք դա կքննարկենք։ Մենք այս պահին եւ արտահանման, եւ իրացման հետ կապված որեւէ խնդիր չունենք, որեւէ ահազանգ չենք ստացել։ Եթե այս պահին բիզնեսը խնդիր չի բարձրաձայնում, մենք էլ չենք տեսնում խնդիր»,- ասաց նա։
Ռոզա ՀՈՎՀԱՆՆԻՍՅԱՆ
