ՄԱԿ-ի կլիմայի փոփոխության մասին շրջանակային կոնվենցիայի մասնակիցների կոնֆերանսի 29-րդ նստաշրջանը (COP 29) Ադրբեջանում անցկացնելու սխալը սկսվել է հենց այն ժամանակ, երբ ՀՀ-ն հրաժարվել է այդ նույն կոնֆերանսն իր մոտ ընդունել: Այսօր ՄԱԿ-ի երեւանյան գրասենյակի դիմաց բողոքի ցույցի ժամանակ նման կարծիք հայտնեց ՀՀ Մարդու իրավունքների առաջին պաշտպան Լարիսա Ալավերդյանը:
«Հայաստանը, չգիտես ինչի դիմաց, զիջել է, դա կոպիտ քաղաքական սխալ է, որովհետեւ ՀՀ-ն այնքան խնդիրներ ուներ: Որ ասում են ռազմական գերիներ, նրանք բոլոր ապօրինաբար պահվում են, նրանք չեն վերցվել մարտական գործողությունների ժամանակ: Հենց այս հարցը պետական մակարդակով անընդհատ պետք է հնչեցվեր: Այս առումով այսպիսի միջոցառումներն անհրաժեշտ են, բայց բավարար չեն ինչ-որ բան փոխելու համար: 2020 թվականից Բաքվում պահվում են անօրինական ձերբակալված անձինք ու այս աստիճանի անտարբերություն: Չեմ կարծում, որ COP29-ի անցկացման վայրը կփոխեն, բայց որ կարելի է ինչ-որ բան այդտեղից կորզել, դա հաստատ է »,- լրագրողների հետ զրույցում ասաց Լարիսա Ալավերդյանը:
Ինչպես ինչ-որ բան կորզել, եթե ՀՀ-ն չի մասնակցում այդ կոնֆերանսին՝ հարցին տիկին Ալավերդյանն այսպես արձագանքեց. «Դե լավ է, որ գոնե չենք մասնակցում: Կրկնում եմ՝ մասնակցությունը համաձայնություն է այդ երկրի քաղաքականության հետ: Իսկ գերիների վերադարձի առումով ինչ-որ ձեւով հնարավոր է: Միջազգային պետությունները ավելի շատ կգնան նման բաների, որովհետեւ դրանք զարդարում են իրենց որպես մարդասիրական իրավունքի ջատագովներ: Չգնալը այս իշխանությունների համար պարտադրված քայլ էր, որովհետեւ գնալը կնշանակեր, որ համաձայնում են Ադրբեջանի եւ Թուրքիայի ցեղասպան քաղաքականության հետ»:
Կարդացեք նաև
Արփինե ՍԻՄՈՆՅԱՆ
