Հայաստանի ազգային պատկերասրահի գլուխգործոցներից է ֆլորենտացի վարպետ-նորարար Դոնատելլոյի «Տիրամայրը մանկան հետ» մարմարե հարթաքանդակը։
Եվրոպական քանդակագործության զարգացման գործում առանցքային դեր ունեցող այս մեծանուն վարպետը ձևափոխել է հարթաքանդակի գեղարվեստական արտահայտչամիջոցները` ներմուծելով գեղանկարչությանը հատուկ տարրեր` ծեփվածքի հարթապատկերային մշակում և հեռանկարի առկայություն:
Դոնատելլոն մի ամբողջ շարք ունի «Տիրամայրը մանկան հետ» թեմայով։ Այս օրինակում Տիրամայրը ներկայացված է «գորովանք» տիպի պատկերագրությամբ, առկա են քերովբեների ֆիգուրներ:
Կարդացեք նաև
Դոնատելլո, 1386-1466, Տիրամայրը մանկան հետ, մարմար
Մինչև 1919 թվականը հարթաքանդակը գտնվել է ռուս իշխան Սերգեյ Ալեքսանդրովիչի պետերբուրգյան պալատում, որտեղ պատից պոկելու արդյունքում լուրջ վնասելով՝ այն փոխանցել են Պետական Էրմիտաժին։ 1930 թվականին կոտրված հարթաքանդակը տեղափոխվել է Հայաստանի ազգային պատկերասրահ, որտեղ տևական վերականգնումից հետո հնարավոր է եղել վերադարձնել եզակի ստեղծագործության նախնական տեսքն ու շքեղությունը։
Իտալական Վաղ Վերածննդի պլաստիկայի այս փայլուն նմուշը կարելի է տեսնել «Իտալական արվեստի դրվագները Հայաստանում» ցուցահանդեսում։
ՀԱՅԱՍՏԱՆԻ ԱԶԳԱՅԻՆ ՊԱՏԿԵՐԱՍՐԱՀ
