Aravot.am-ի տեղեկություններով, օրերս Գյումրու ոստիկանության «Կումայրի» բաժին է դիմել պետական կառույցներից մեկի 37-ամյա աշխատակցուհի Վ․Պ․-ն՝ հաղորդում ներկայացնելով իրեն խարդախությամբ դրամաշորթության ենթարկելու մասին։
Նա տեղեկացրել է, որ հուլիսի 31-ին «Ֆեյսբուք» սոցիալական ցանցում նկատել է աշխատանքի առաջարկ, որով սկսել է հետաքրքրվել։ «Վոցապ», «Տելեգրամ» հավելվածների միջոցով նրան ներկայացրել են աշխատանքային պայմանները, առաջարկել մեկ շաբաթվա ընթացքում՝ հուլիս 31-ից մինչև օգոստոսի 6-ն ընկած ժամանակահատվածում, շահույթ ստանալու նպատակով գումար փոխանցել մի քանի հաշվեհամարների։
Չնայած ոստիկանության ու մասնագետների՝ չխաբվելու, կիբեռհանցագործությունների չենթարկվելու մասին բազում նախազգուշացումներին՝ կինը միամտաբար բավական մեծ գումարներ է փոխանցել Հայաստանի տարբեր մարզերում բնակվող մի քանի անձանց։
Նա Մարտունիի բնակիչ Ս․Մ․-ի հաշվեհամարին փոխանցել է 107.000 դրամ, Վայքի բնակիչ՝ Գ․Դ․-ի հաշվեհամարներին 738.000 դրամ, գյուղ Ծովակի բնակիչ Հ․Վ․-ի հաշվեհամարներին 575.000 դրամ, Աբովյան քաղաքի բնակչուհի Մ․ Հ․-ի հաշվեհամարին 415.000 դրամ։ Փոխանցումներ կատարել է նաև այլ հաշվեհամարների՝ 971.000, 490.000, 300.000, 100.000 դրամ գումարի չափով, սակայն հետո հասկացել է, որ իրեն խաբել են:
Կարդացեք նաև
Ոստիկանություն դիմած կինը նշել է, որ իրեն պատճառած վնասը կազմում է ընդհանուր 3.696.000 դրամ։
Ոստիկանությունում կազմված փաստաթղթերն ուղարկվել են Շիրակի մարզային քննչական վարչություն։
