Փարիզի 33-րդ ամառային օլիմպիական խաղերի ծանրամարտի մրցաշարի վերջին օրը զարդարեցին տղամարդկանց գերծանր քաշայինները։
Մեդալների համար պայքարն ինչպես միշտ ընթացավ Վրաստանի ներկայացուցիչ Լաշա Տալախաձեի, Հայաստանի օլիմպիական հավաքականի անդամ, գյումրեցի Վարազդատ Լալայանի եւ ներկայումս Բահրեյնի դրոշի ներքո հանդես եկող նույնպես գյումրեցի Գոռ Մինասյանի միջեւ։
Տալախաձեն, որ վերջին տարիներին ոչ պոկում, ոչ հրում վարժություններում եւ ոչ էլ երկամարտում պատվո պատվանդանի առաջին աստիճանը ոչ մեկին չէր զիջել, պոկում վարժությունն ավարտեց 215 կգ-ով, մեկ կիլոգրամ պարտվեց Գոռ Մինասյանին։ Իսկ Վարազդատ Լալայանը երրորդը ճանաչվեց նույն արդյունքով, քանի որ 215-ը ֆիքսել էր Լաշայից հետո։
Կարդացեք նաև
Առավել հետաքրքիր անցավ հրում վարժությունը։ Լաշան, թերեւս, առաջին անգամ զգաց մեր ծանրորդներին պարտվելու վտանգը, ինչը միանգամայն իրականանալի էր, սակայն այս անգամ էլ ճակատագիրը բարեհաճ գտնվեց վրացու հանդեպ։
Ի վերջո, երկամարտի 470 կգ-ով Տալախաձեն հերթական անգամ նվաճեց օլիմպիական չեմպիոնի տիտղոսը, Վարազդատ Լալայանը նրան զիջեց ընդամենը 3 կգ եւ արժանացավ օլիմպիական արծաթե մեդալի, իսկ Գոռ Մինասյանը 461 կգ-ով բավարարվեց օլիմպիական բրոնզով։
Աշոտ ՀԱԿՈԲՅԱՆ
