Օգոստոսի 5-8-ը Հայաստանի կինոգործիչների միության «Լորիկ» սրահում արդեն 12-րդ անգամ արգենտինահայ կինոգործիչ, «Սինեմատեկա Արմենիայի» հիմնադիր Ջեք Պողոսյանի ջանքերով Երեւանում անցկացվեց Ուրուգվայական ֆիլմերի փառատոն:
Փառատոնի շրջանակում ցուցադրված ֆիլմերը ներկայացնում էին Ուրուգվայի ոգին՝ իր պատմության, երաժշտության եւ այնի միջոցով: Ջեք Պողոսյանը համոզված է, որ ուրուգվայական կինոն բացի Հայաստանում ներկայանալուց՝ նաեւ երկրների միջեւ մշակութային փոխանակումների խթան կարող է հանդիսանալ, այն նաեւ կարեւոր կապ է Հայաստանի և Ուրուգվայի միջեւ: Ընդ որում, Ուրուգվայը Հայոց ցեղասպանությունը ճանաչած առաջին երկրներից է, որտեղ հայկական մեծ համայնք կա:
Ջեքը 15 տարի ուրուգվայական ֆիլմեր է ցուցադրում Հայաստանում, սկզբում դա եղել է Ուրուգվայական կինոյի օրերի, կամ ինչ-որ ծրագրերի ձեւաչափով, հետո պաշտոնապես դարձել է Ուրուգվայական ֆիլմերի փառատոն: «Ես շատ ուրախ եմ, որ այս տարի նորից կարողացա իրականացնել Ուրուգվայական ֆիլմերի փառատոնը»,-Aravot.am-ի հետ զրույցում ասաց Ջեք Պողոսյանը:
Կարդացեք նաև
Նա ոգեւորությամբ խոսեց նաեւ Ուրուգվայում հայկական դեսպանության բացվելու եւ Մարիամ Գեւորգյանի՝ դեսպան նշանակվելու մասին: Մեր զրուցակիցը հավելեց, որ Ուրուգվայում Հայաստանի դեսպանության, ՀԲԸՄ Ուրուգվայի մասնաճյուղի և «Սինեմատեկա Արմենիա»-ի հովանու ներքո է կայացել Ուրուգվայական ֆիլմերի 12-րդ փառատոնը: Ֆիլմերը ցուցադրվել են իսպաներեն՝ անգլերեն ենթագրերով: Մուտքն ազատ է եղել:
«Այս կինոփառատոնն ինձ համար շատ կարեւոր է, ուրուգվայական ֆիլմերը ոչ թե զուտ ինչ-որ պատմություն են պատմում, այլ դրանց միջոցով վերակերտվում է Ուրուգվայի կերպարը եւ ներկայացվում առանձնահատկությունները: Այս տարի 4 լավ ֆիլմ ցուցադրեցինք, խաղարկային ֆիլմեր էին՝ ռոմանտիկ կոմեդիա, դրամա ֆուտբոլի մասին, ընտանեկան դրամա եւ եւս մեկ մրցանակակիր ֆիլմ: Ընդհանրապես այս փառատոնը յուրատեսակ մշակութային կամուրջ է Հայաստանի եւ Ուրուգվայի միջեւ»,-ասաց Ջեք Պողոսյանը:
Նա նշեց, որ ցանկանում է հաջորդ տարի Հայաստանում հանդես գալ մեկ այլ ծրագրով, որտեղ կներկայացնի ֆիլմեր, գրականություն եւ երաժշտություն, եւ այդ ծրագրում մեծ տեղ կունենա իր սիրելի հեղինակներից Խորխե Լուիս Բորխեսը: Մտադիր է նաեւ կրկին ներկայացնել արգենտինական տանգոյի մասին ֆիլմերի ծրագիրը, որի մեկնարկը տրվել էր դեռեւս 2009 թվականին: Հավելեց, որ Արգենտինայում էլ պատրաստում է Միգել Հերնանդեսի եւ Գարսիա Լորկայի պոեզիային նվիրված գրական-երաժշտական ծրագիրը, որի ժամանակ կլինի կիթառ եւ կերգի հենց ինքը:
Մեր զրուցակիցը նշեց, որ մեծ աշխատանք է տարվում նաեւ Ուրուգվայում հայկական կինոն հանրահռչակելու առումով: «Ես պաշտում եմ հայկական կինոն, ուզում եմ, որ բոլորը խոսեն հայկական կինոյի մասին Արգենտինայում եւ Ուրուգվայում»,-ասաց նա: Ընդգծեց, որ արդեն 20 տարի AGBU- Բուենոս Այրեսի գրասենյակում ամեն ամիս կազմակերպվում է հայկական ֆիլմերի ցուցադրություն: Հանդիսատեսը հետաքրքրությամբ է դիտում ժամանակակից հայկական ֆիլմերը, հատկապես ջերմությամբ է ընդունել Իննա Սահակյանի «Ավրորայի լուսաբացը»:
Մեկ այլ փակագիծ էլ բացեց ՝ չի բացառվում,որ առաջիկայում մի քանի կինոգործիչ ընկերներով Եվրոպայում կինոփառատոն հիմնեն:
Գոհար ՀԱԿՈԲՅԱՆ
