Եվրոպական միությունը նախորդ տարի հատկացրել է 130,7 միլիոն եվրո՝ աջակցելու ավելի քան 67,000 փոքր եւ միջին ձեռնարկությունների (ՓՄՁ) Հայաստանում, Ադրբեջանում, Վրաստանում, Մոլդովայում եւ Ուկրաինայում, որոնց 42,5%-ը պատկանում է կանանց: Արդյունքում, ԵՄ-ի կողմից աջակցվող ՓՄՁ-ները տարածաշրջանում ստեղծել են մոտ 80,000 նոր աշխատատեղ եւ գեներացրել 1 միլիարդ եվրո արտահանման արժեք։ Այս մասին ասվում է Արեւելյան գործընկերության տարածաշրջանում ՓՄՁ աջակցության մասին EU4Business-ի տարեկան զեկույցում, որը հրապարակվել է ս.թ. հուլիսի 29-ին:
Զեկույցը խորքային տեղեկատվություն է փոխանցում 2023 թվականի ընթացքում փոքր բիզնեսին երեք հիմնական ոլորտներում ԵՄ աջակցության վերաբերյալ՝ ֆինանսների հասանելիություն, բիզնեսի զարգացման ծառայություններ եւ բիզնեսի համար նպաստավոր միջավայր:
Ֆինանսների հասանելիություն
Նախորդ տարի մոտ 32,000 ՓՄՁ-ներ ստացել են ֆինանսական աջակցություն՝ ավելի քան 1,4 միլիարդ եվրոյի վարկերի տեսքով, ընդ որում՝ վարկի միջին չափը կազմել է մոտ 40,000 եվրո:
Կարդացեք նաև
Բիզնեսի զարգացման ծառայություններ
2023 թվականին 31,4 միլիոն եվրո է ուղղվել տարածաշրջանում ՓՄՁ-ների մասնագիտական հմտությունների զարգացմանը, ինչը կազմում է հատկացված ընդհանուր միջոցների ավելի քան 24%-ը: Ավելի քան 34,000 ՓՄՁ-ներ ստացել են խորհրդատվական ծառայությունների, ինկուբատորների, կլաստերների եւ B2B գործունեության տեսքով աջակցություն։ Աջակցություն են ստացել նաեւ 1,033 գործարարության աջակցման կազմակերպություններ:
Բիզնեսի համար նպաստավոր միջավայր
ԵՄ-ն 28,3 միլիոն եվրո է հատկացրել՝ աջակցելու բիզնեսի համար նպաստավոր միջավայրին: Այս ֆինանսավորումն օգնել է մինչեւ 6,000 պետական հաստատությունների՝ ներառյալ քաղաքականություն մշակողներ, կարգավորող մարմիններ եւ իրավապահ մարմիններ, զարգացնել իրենց կարողությունները, ինչպես նաեւ հանգեցրել է ավելի քան 745 օրենքների, կանոնակարգերի եւ ընթացակարգերի բարեփոխմանը:
EU4Business-ը (ԵՄ-ն բիզնեսի համար) հովանավորության նախաձեռնություն է, որը ներառում է ԵՄ ամբողջ աջակցությունը փոքր եւ միջին ձեռնարկություններին (ՓՄՁ-ներին) Արեւելյան գործընկերության երկրներում` Հայաստանում, Ադրբեջանում, Վրաստանում, Մոլդովայում եւ Ուկրաինայում: ԵՄ-ն սատարում է ՓՄՁ-ների աճը` լավարկելով ֆինանսներին եւ բիզնեսի զարգացման ծառայությունների հասանելիությունը եւ խթանելով բիզնես ոլորտում ավելի լավ կարգավորումները:
EU NEIGHBOURS east
