Սրբազան պայքարի առաջնորդ Բագրատ սրբազանը Սուրբ Աննա եկեղեցու բակում լրագրողների հետ ճեպազրույցում անդրադարձավ տեղեկությանը, որ Սիսիան-Նախիջեւան հատվածում հայկական զորքերը դուրս են բերվում դիրքերից։ «Մենք տեղեկատվությանը տիրապետում ենք, Պաշտպանության նախարարությունը հերքել է դա, այդուհանդերձ նաեւ ներքին կարգով գիտենք, որ դիտորդները գնացել են, ինչ-որ չափագրումներ են եղել։ Վերջնական դա էլ կճշտենք։ Դա մեզ համար չափազանց կարեւոր բարձունք է։ Եվ, բնականաբար, այդ խնդիրը չի կարող հենց այնպես անցնել»,- ասաց Բագրատ սրբազանը։
Անդրադառնալով հայ-թուրքական սահմանին հուլիսի 30-ին կայանալիք հանդիպմանը՝ Բագրատ սրբազանն ասաց․ «Հերթական խաբեությունը պետք է լինի։ Նախնական չգիտենք, թե ինչ է քննարկվելու, ոչ մի տվյալ չունենք»։
Բագրատ սրբազանն արձագանքեց նաեւ ԱԳ նախարար Արարատ Միրզոյանի՝ Կիպրոս կատարած այցի ժամանակ արած հայտարարությանը, որ «Հայաստանն ուզում է օգտագործել այս պատմական պահն ու փակել Ադրբեջանի հետ թշնամանքի էջը»։ «Այսինքն՝ ավերել հասցրել են մի տեղ, լրիվ ոչնչացրել են, հիմա ասում են՝ սա պատմական հնարավորություն է։ Նվաստացումը պատմական հնարավորությո՞ւն է մեզ համար»,- ասաց սրբազանը։
Կարդացեք նաև
Նա անդրադարձավ նաեւ Վայոց ձոր կատարած այցին։ «Թե Վայքում, թե Ջերմուկում, թե հետագայում Եղեգնաձորի գյուղերում հարցը միայն այդ հավաքվող մարդիկ չեն, որոնք, չնայած ճնշումներին, ոչնչից չեն վախենում, ամենագեղեցիկը այդ գյուղերով քայլելն էր։ Գյուղում ես գրեթե տուն չեմ տեսել, որ չողջունեն կամ ներս չհրավիրեն։ Այնպես որ, վերստին պետք է ասեմ՝ մեր երկրում մթնոլորտը փոփոխությունների մթնոլորտ է։ Եվ մեզ մնում է միայն ճիշտ ճանապարհով հունավորել ու հասցնել տեղ։ Սպասումները շատ մեծ են մարդկանց»,- ասաց Բագրատ սրբազանը։
Նա նշեց, որ մարզային այցերը շարունակվելու են, առաջիկայում դարձյալ կայցելեն Գեղարքունիքի մարզ։
Ռոզա ՀՈՎՀԱՆՆԻՍՅԱՆ
Լուսանկարները՝ Սրբազան պայքարի ՖԲ էջից
