2024թ. հուլիսի 26-ին «Ֆիթչ» վարկանիշային գործակալությունը վերահաստատել է Հայաստանի Հանրապետության՝ արտարժույթով երկարաժամկետ պարտավորությունների թողարկման սուվերեն «BB-» վարկանիշը՝ կայուն հեռանկարով:
Վարկանիշի պահպանման հիմքում ընկած են բնակչության մեկ շնչին ընկնող եկամտի ու կառավարման ՝ համեմատվող երկրների հետ համադրելի ցուցանիշները, տնտեսական աճի կայուն հեռանկարները, երկրի ամուր մակրոտնտեսական քաղաքականության շրջանակը:
Գործակալության գնահատմամբ` տնտեսական աճի վրա շարունակում են դրական ազդեցություն ունենալ Ռուսաստանից, Բելառուսից, Ուկրաինայից, այժմ նաև` Լեռնային Ղարաբաղից միգրացիան: Ակնկալվում է, որ տուրիզմի և տեղեկատվական ու հաղորդակցական տեխնոլոգիաների ոլորտները կլինեն աճի կարևոր շարժիչ ուժերը: Արտահանման և աճի վրա բարենպաստ ազդեցություն կունենա նաև 2025 թվականից Ամուլսարի ոսկու հանքի շահագործման մեկնարկը: Այսպես, գործակալությունը 2024-2026թթ. համար ակնկալում է համապատասխանաբար 6%, 5.5% և 5.1% տնտեսական աճ:
Գործակալությունն անդրադարձել է նաև Լեռնային Ղարաբաղից բռնի տեղահանված անձանց կարիքների հասցեագրման, պաշտպանական ու կապիտալ ծրագրերի ուղղությամբ ծախսերի աճին, ինչի արդյունքներով «Ֆիթչ»-ը 2024թ. ակնկալում է, որ պետական բյուջեի պակասուրդը ՀՆԱ-ի նկատմամբ կկազմի 4.5%: Ըստ գործակալության կանխատեսումների` վերոնշյալ գործոններին զուգահեռ 2025թ. առողջության համապարփակ ապահովագրության համակարգի ներդրումը կհանգեցնի հավելյալ ծախսային ճնշումների, որի հետևանքով բյուջեի պակասուրդ/ՀՆԱ հարաբերակցությունը կաճի մինչև 5.4%: 2026թ. համար գործակալությունը, սակայն, ակնկալում է ՀՆԱ-ի նկատմամբ պակասուրդի 4.2% մակարդակ՝ պայմանավորված փախստականների հետ կապված ծախսերի նվազմամբ ու հարկային բարեփոխումների արդյունքում բյուջեի եկամուտների ավելացմամբ:
Կարդացեք նաև
Գործակալությունը 2024թ. ավարտին կառավարության պարտք/ՀՆԱ հարաբերակցությունը կանխատեսում է 48.7% և դրա կայունացում 50.5%-ի շրջակայքում 2026թ., ինչը ցածր է համադրելի երկրների 55.2% միջինից:
Գործակալությունն անդրադարձել է նաև աշխարհաքաղաքական առկա ռիսկերին, բանկային համակարգի դոլարիզացիային, արտաքին ֆինանսներին ու գնաճին:
Զեկույցին կարող եք ծանոթանալ հետևյալ հղումով:
ՀՀ ֆինանսների նախարարություն
