Առկա 3502 հասարակական եւ այլ նշանակության հողի վարձակալության պայմանագրերից 1802-ը հաշվարկվում է նոր կադաստրային արժեքով, իսկ 565 վարձակալների մասով ծանուցումներ են ուղարկվել, կան ավելի քան 363 խնդրահարույց վարձակալներ, իսկ 119 վարձակալների նպատակահարմար չեն գտել ծանուցումներ ուղարկել, քանի որ հետագայում ապամոնտաժման աշխատանքներ պետք է իրականացվեն, 16325 ավտոտնակների օժանդակ շինությունների, խորդանոցների եւ այլ վարձակալական պայմանագրերից 10105-ը հաշվարկվում է նոր կադաստրային արժեքով: Այս մասին Երեւանի քաղաքապետարանի գործակարգավարական խորհրդակցության ժամանակ տեղեկացրին Երևանի քաղաքապետ Տիգրան Ավինյանին:
Նշվեց նաեւ, որ վարձակալների ավելի քան 95 տոկոսի մասով կատարվել են ծանուցման կամ ճշգրտման աշխատանքներ:
Տիգրան Ավինյանի ձեւակերպմամբ, Երեւան քաղաքի կանաչ զանգվածների տարբեր վարձակալության պայմանագրեր տարիներով եղել են խնդրահարույց: «Այդ այգիները այն տեսքի եւ նշանակության չեն բերվել, ինչ իրենց հիմնադրման օրվանից եղել է իրենց նպատակը: Եվ սա շատ լավ առիթ է, որ գործող եւ պոտենցիալ վարձակալների հետ նորից խոսակցություն բացենք այն մասին, որ այս այգիների տարածքները, բացի իրենց բիզնես նպատակներին ծառայելուց, նաեւ մարդկանց հավաքատեղի են, զբոսնելու վայրեր: Ինքներս կարող ենք առաջարկել նախագծեր…Իսկ եթե չի ստացվում համաձայնության գալ, խզենք նախկին պայմանագրերը, որովհետեւ վստահ չեմ, որ բոլորն են ուզում ավելի մեծ վճարներ վճարել եւ հին տրամաբանությամբ շահագործել տարածքները»,-ասաց Ավինյանը:
Գոհար ՀԱԿՈԲՅԱՆ
