Արցախյան փոքր բիզնեսին աջակցելուն ուղղված Shop in Armenia հարթակի շնորհանդեսի ընթացքում զրուցեցինք արցախցիների հետ, որոնք ներկայացնում էին իրենց ձեռագործ աշխատանքները:
Նրանցից յուրաքանչյուրն ունի իր պատմությունը. Անուշ Սարգսյանը տեղափոխվել է Հայաստան սեպտեմբերի 25-ին: Հելյունագործ խաղալիքներ պատրաստում է դեռ Արցախից. «Ինձ համար այս աշխատանքը նախնական շրջանում միայն զբաղմունք էր և փորձնական էի պատրաստում: Սակայն այստեղ մինչ մշտական աշխատանք գտնելը, փորձեցի պատրաստել, և այսպես ինչ-որ չափով եկամուտ ստանալ»,-ասաց Ա. Սարգսյանը: Նա մասնակցել է «Ոսկե ձեռքեր» առաջին և երկրորդ փառատոններին, և փառատոնից հետո ստացավ առաջարկ մասնակցելու Shop in Armenia ցուցահանդեսին: Ինչպես նշում է արցախցին՝ նախնական շրջանում բրենդը անուն չի ունեցել. «Երբ անուն չկար, որոշեցինք այն կոչել «SALAD»(ՍԱԼԱԴ), որը հապավում է. մեր ընտանիքի անդամների անվանատառերն են»,-ընդգծեց նա:
Կարդացեք նաև
Իր աշխատանքներով աչքի ընկավ նաև Լուսինե Գասպարյանը, որ լինելով մասնագիտությամբ արվեստաբան, ինչպես նաև ամբողջ կյանքը աշխատել է վարչական աշխատանքով, տեղահանումից հետո չունենալով աշխատանք՝ սկսել է զբաղվել հելունագործությամբ. «Այս հոբբին (զբաղմունք) ինձ համար դարձավ աշխատանք և սկսեցի ստեղծագործել: Հիմնեցի իմ ապրանքանիշը՝ Լուսեն»,-ասաց Լ. Գասպարյանը: Նա հելունագործում է հրեշտակներ և ինչպես նշեց, այդ հրեշտակները պահապան կլինեն իրենց տերերին:
Բալայան Դիանան ևս բռնի տեղահանված է, և չնայած չափազանց երիտասարդ է, հիմնել է իր բրենդը՝ կոչելով «Sister’s flowers» (Քույրերի ծաղիկներ). «Այդպես ենք անվանել, քանի որ քույրիկս ծաղիկներ է սիրում, իսկ ես՝ շոկոլադ»,-ասաց Դիանան:
Լիլիթ ԱԲՐԱՀԱՄՅԱՆ
