Երեխային բռնության ենթարկած մանկապարտեզի աշխատակիցն ազատվել է աշխատանքից, Sputnik Արմենիային հայտնեց Արարատի մարզպետ Սեդրակ Թևոնյանը։
Հիշեցնենք՝ համացանցում տեսանյութ է տարածվում մանկապարտեզի ննջասենյակից․ կադրերում մի կին ֆիզիկական բռնության է ենթարկում երեխային։ Նա ձեռքով հարվածներ է հասցնում երեխայի մարմնի տարբեր հատվածներին, բղավում նրա վրա, սպառնում։ «Արդեն դու զզվցրեցիր»,-ուժգին հարվածներ հասցնելով բղավում է մանկապարտեզի «դաստիարակը»։ Երեխան ցավից ճչում է․ «Ախ, մեռա»։
Տեսանյութի նկարագրությունում նշվում է, որ Վեդիում է նկարվել:
ԿԳՄՍ նախարությունը դատապարտում է բռնության ցանկացած դրսևորում. «ՀՀ ԿԳՄՍ նախարարությունն ուսումնասիրման նպատակով համապատասխան մարմիններին է փոխանցել համացանցում շրջանառվող տեսանյութը՝ փոքրահասակ երեխայի նկատմամբ բռնության վերաբերյալ:
Կարդացեք նաև
ԿԳՄՍ նախարարությունը դատապարտում է բռնության ցանկացած դրսևորում և հետամուտ է լինելու, որպեսզի միջադեպը բացահայտվի և օրենքի շրջանակում ստանա իրավական գնահատական:
Բռնության ցանկացած դրսևորում անհարիր է կրթական միջավայրին, և նման գործելաոճով առաջնորդվողները տեղ չունեն և չեն կարող ունենալ ուսումնական հաստատություններում, որոնցում պետք է առաջնային լինի երեխայի լավագույն շահի պաշտպանությունը»:
ՄԻՊ-ը հայտնում է . «Մարդու իրավունքների պաշտպանի հանձնարարությամբ աշխատակազմում անմիջապես սկսվել է ուսումնասիրություն:
ՄԻՊ աշխատակազմն անմիջապես կապ է հաստատել իրավասու մարմինների ներկայացուցիչների հետ՝ միջադեպի առնչությամբ անհրաժեշտ քայլեր ձեռնարկելու նպատակով:
Երեխայի լավագույն շահը, նրա իրավունքների պաշտպանությունը Մարդու իրավունքների պաշտպանի առաջնահերթություններից են:
Պաշտպանն ընդգծում է, որ պետությունն ունի պարտավորություն` ձեռնարկելու անհրաժեշտ և բավարար միջոցներ՝ երաշխավորելու երեխայի պաշտպանությունը բռնությունից։
