«Հյուսիսային տերեւաթափի» գործով դատական նիստն այսօր տեղի չունեցավ: Այն հետաձգվեց՝ մեղադրյալներից մեկի՝ մեղադրական եզրակացությունը չստանալու պատճառով:
Հիշեցնենք, որ 2023-ի նոյեմբերի 2-ին ԱԱԾ-ի տարածած հաղորդագրության համաձայն՝ «Նախաքննության ընթացքում կատարված ապացուցողական և վարութային այլ գործողությունների արդյունքում պարզվել է, որ Ա.Մ-ն, Ս.Մ-ի, Է.Ծ-ի, Վ.Ո-ի, Կ.Ս-ի և քննությամբ դեռևս ինքնությունները չպարզված այլ անձանց հետ նախնական համաձայնությամբ, խմբի կազմում գործիքներ, միջոցներ ձեռք բերելու, դրանք հարմարեցնելու և դիտավորությամբ այլ պայման ստեղծելու եղանակով 2023 թվականի ընթացքում նախապատրաստել են կատարել պայթյուն և այլ հանրավտանգ արարք, ինչպես նաև զավթել և պահել ՀՀ պետական նշանակության և այլ շինություններ՝ զուգորդված քաղաքացիական անձին կյանքից զրկելու, ենթադրյալ խոշոր չափերի գույքային վնաս պատճառելու և այլ ծանր հետևանք առաջացնելու վտանգով, որի նպատակն է եղել հանրային իշխանության մարմինների գործունեությունը կազմալուծելը, սակայն իրենց կամքից անկախ հանգամանքներով չեն կարողացել սկսել դիտավորության մեջ ընդգրկված հանցանքի օբյեկտիվ կողմի կատարումը, քանի որ հանցանքը բացահայտվել է ՀՀ ազգային անվտանգության ծառայության կողմից: Քրեական վարույթի շրջանակներում ձեռք բերված բավարար փաստական տվյալների հիման վրա հանցավոր խմբի 5 անդամների նկատմամբ ՀՀ քրեական օրենսգրքի համապատասխան հոդվածով հարուցվել են հանրային քրեական հետապնդումներ, ներկայացվել են մեղադրանքներ: Վերջիններիս նկատմամբ որպես խափանման միջոց՝ կիրառվել է կալանքը»։
Գործով մեղադրյալներից Վազգեն Ոսկանյանի պաշտպան Զորայր Հարությունյանը նիստից հետո լրագրողներին ասաց, որ գործի նյութերին ծանոթանալիս եւ կալանավորման միջնորդությունների քննարկման ժամանակ հետեւությունը միանշանակ է. «Մեղադրանքը փաստական տվյալների խեղման հետեւանք է, մեղադրանքը փաստական տվյալների՝ իրականության յուրովի մեկնաբանություն է, որեւէ կապ չունի իրականության հետ:
Կարդացեք նաև
Այս դատաքննության արդյունքը պետք է լինի իմ պաշտպանյալի ու մյուս մեղադրյալների արդարացումը»:
Արփինե ՍԻՄՈՆՅԱՆ
