Տավուշի մարզի առաջին ատյանի ընդհանուր իրավասության դատարանի՝ Իջևան քաղաքի նստավայրում այսօր շարունակվեց ԱԺ նախկին պատգամավոր, ՀՅԴ անդամ Սուրեն Մանուկյանի գործով հերթական դատական նիստը։
Դատարանը հայտնեց, որ հանրային մեղադրողը 3 մեղադրյալների խափանման միջոցի երկարաձգման վերաբերյալ միջնորդություններ է ներկայացրել։
Մանուկյանի պաշտպան Սերգեյ Ոսկանյանը մեղադրողի միջնորդության վերաբերյալ ներկայացրեց իր դիտարկումները.
«Օգոստոսի 11-ին լրանում է ուղիղ 2 տարին, ինչ Սուրեն Մանուկյանը գտնվում է անազատության մեջ։ Գաղտնիք չէ, որ նույնիսկ ՄԻԵԴ-ը մեղսագրվող ամենածանր հանցագործությունների դեպքում արձանագրել է՝ որքան երկար է տեւում գործի քննության ժամանակահատվածը, այնքան աստիճանաբար նվազում է անձի նկատմամբ ամենախիստ խափանման միջոց կալանավորումը շարունակաբար կիրառելու անհրաժեշտությունը: Թվում է՝ մարդու իրավունքների եվրոպական կոնվենցիայով ամրագրված այս իրավադրույթները պարտադիր են բոլոր երկրների համար, բացի Հայաստանից ու բացի այս դատարանից ու բացի այս գործով: Զարմանում եմ՝ ինչպես կարելի է յուրաքանչյուր անգամ խափանման միջոցի հարցի քննարկման ժամանակ մեղադրողն ասի, որ գտնում է՝ հիմքերը շարունակում են առկա լինել ու երկարացնել նույնական խափանման միջոցները: Արդյոք չպե՞տք է հանրային մեղադրողը ներկայացնի, թե այդ որ հիմքն է առկա: Լա՛վ, այդ հիմքերը երբ են վերանալու, մենք ամեն դատական նիստին ապացույցներ ենք քննարկում, այդ հիմքերը չե՞ն նվազում»:
Կարդացեք նաև
Փաստաբանը նկատեց, որ արդարադատության իմիտացիա են անում, բայց ոչ արդարադատություն. «Ի՞նչ է նշանակում հիմքերն առկա են, պետք է մնա կալանքի տակ: Ինչո՞ւ չի քննարկվում տնային կալանքը: Բերեք մի օրինակ, ասեք՝ այ եթե լինի տնային կալանքի տակ, տանը նստած կազդի որեւէ մեկի վրա, էս մի ապացույցը կոչնչացնի, էստեղ կեղծիք կկատարի: Սա ծաղր է արդարադատության վրա: Հանրային մեղադրողն այնքան արխային է ընկել, որ չի բարեհաճում գոնե մի նախադասությամբ ներկայացնի՝ որ հիմքն է առկա ու ինչու»:
Փաստաբանն ասաց, որ Մանուկյանի խափանման միջոցի հերթական երկարաձգումը կլինի օրենքի կոպիտ խախտում:
Հիշեցնենք, որ Սուրեն Մանուկյանը մեղադրվում է «Ազատ դեմոկրատներ» կուսակցության նախագահ Խաչատուր Քոքոբելյանի հոր առևանգման գործով:
Արփինե ՍԻՄՈՆՅԱՆ
