Գյումրու քաղաքապետարանի ներքնահարկում գտնվող «Կումայրի պատմամշակութային արգելոց- թանգարանի» ցուցասրահում «Գյումրու Կումայրի պարային համույթի» երիտասարդ պարուհիների միստիկ կատարումների ներքո բացվեց 20-րդ դարի հայ հռչակավոր կինոռեժիսոր, սցենարիստ, ՀԽՍՀ ժողովրդական արտիստ, ՈՒԽՍՀ ժողովրդական արտիստ Սերգեյ Փարաջանովի աշխատանքների ցուցահանդեսը։
Այն նվիրված է մեծանուն արվեստագետի 100-ամյակին։
Ինչպես իր ելույթում տեղեկացրեց Գյումրու քաղաքապետարանի մշակույթի և երիտասարդության հարցերի բաժնի պետ Լիլիթ Թովմասյանը, Փարաջանովի տուն-թանգարանից Գյումրի են տեղափոխվել նրա մոտ 40 աշխատանքներ։
Կարդացեք նաև
Ըստ բանախոսի, գյումրեցիները Փարաջանովի գործերը կարող են վայելել մինչև սեպտեմբերի 9-ը, այն կլինի բաց ցուցադրությամբ՝ մուտքն անվճար է․ սա բացառիկ հնարավորություն է այս քաղաքի բնակիչների համար։
Գյումրի բերված աշխատանքներում ներառում են ֆիլմերից դրվագներ, ճամփորդական նոթեր, բանտում ապրած տարիներ ու դիմապատկերներ։
Գյումրու փոխքաղաքապետ Լուսինե Սանոյանն էլ ասաց, որ հոբելյանական տարին նշում են մշակութային օջախներում՝ «Փարաջանով 100» խորագրի ներքո՝ տարբեր միջոցառումներով։
«Այս ցուցահանդեսը ևս մեկ առիթ է զգալ Փարաջանովի արվեստի ինքնատիպությունն ու կախարդանքը, տեղափոխվել Փարաջանովի աշխարհ»,-ասաց Լուսինե Սանոյանը։
Նունե ԱՐԵՎՇԱՏՅԱՆ
