«Էս ամեն ինչը, ինչ-որ այստեղ պիտի լինի՝ կեղծ է։ Իմաստ չունի ինչ-որ մարդկանցից բաներ լսել։ Սա ֆիկցիա (անիրական) է։ Մնալը ուղղակի իմաստ չունի»,-ասաց «Հանրային վերահսկողություն» իրավապաշտպան հասարակական կազմակերպության նախագահ Մհեր Կարագոզյանը «Անի Գրանդ Հոթել» հյուրանոցում կայացած «ՕՐԴ» ընկերության մամուլի ասուլիսի ընթացքում, որը նվիրված էր Արարատի մարզի Կարմիր սարի կրային մերգելների (կավակրաքարերի) հանքավայրի շահագործմանը։
Ցուցարարները փորձեցին բոյկոտել ասուլիսը․ «Չի կարելի մարդկանց իրավունքները ոտնահարել։ Դուք արհամարհում եք այն, որ մարդիկ չեն ուզում այդտեղ հանք բացվի։ Եթե դուք լսեիք, թե ինչ էին ասում գյուղացիները վերջի՝ Գինեվիտ բնակավայրում հանրային լսումների ժամանակ, կլսեիք, որ մարդիկ բողոքում էին արդեն գոյություն ունեցող հանքերից»,-ընդգծեց ցուցարարը։
Ըստ ցուցարարի՝ այժմ երկրում շատ է անօրինությունը և կառավարությունը ո՛չ նախկինում, ո՛չ հիմա չի սատարում ժողովրդին, այլ նրանց հետաքրքրում են միայն իրենց շահերը․ «Ինչ-որ անհատներ են կանգնած այս ամենի ետևում և մտածում են միայն իրանց գրպանները լցնեն։ Չեն մտածում, որ այդ հանքը բացելով՝ կարող են վնասել մյուսներին»,-ասաց ցուցարարը։ Ըստ նրա՝ հանքը բացվելուց հետո շատ բնակիչներ մեծ կորուստներ են ունենալու։
Կարդացեք նաև
Ցուցարարների կարծիքով՝ հանքավայր կարելի է այնպիսի վայրում կառուցել, որը չի վնասի ժողովրդին և շրջակա միջավայրը։ Մհեր Կարագոզյանը նշեց, որ արդեն առկա է «դառը փորձ»՝ Արարատի ցեմենտի գործարանը, քանի որ այն աշխատել է մի շարք խախտումներով և լիցենզիայով ստանձնած պարտավորությունները խախտել․ «Եթե պետությունը չի կարողանում վերահսկել Արարատի ցեմենտի գործարանը և կան այսքան արտանետումներ, հետևաբար մենք չունենք երաշխիքներ, որ նոր բացվող հանքը կամ գործարանը պատշաճ կերպով կվերահսկվի»,-ասաց նա։
Մանրամասները` տեսանյութում
Լիլիթ Աբրահամյան
