«Բոլորս գիտենք, թե մայիսի 26-ին ինչպիսի աղետ տեղի ունեցավ, Դեբետ գետի մակարդակը բարձրացավ 5 մետրով, արդյունքում երկաթուղին լրջորեն ավերվեց 8 տեղում: Իրավիճակն ավելի էր բարդանում նրանով, որ այդ հատվածներին հասնելու հնարավորություն չկար: Ավերվել էին նաեւ ավտոճանապարհները եւ կամուրջները: Աղետի մասշտաբները բավականին լուրջ էին »,- Sputnik Արմենիայի մամուլի կենտրոնում ասաց Հարավկովկասյան երկաթուղու (ՀԿԵ) գլխավոր տնօրեն Ալեքսեյ Մելնիկովը:
Նա ներկայացրեց, թե ինչպես է հաջողվել սեղմ ժամկետներում վերականգնել Լոռու և Տավուշի մարզում ջրհեղեղի հետևանքով ավերված երկաթուղային գծերը, անդրադարձավ նաեւ ամառային ուղևորափոխադրումներին եւ ՀԿԵ-ի ընթացիկ տարվա խնդիրներին:
«Մենք երկաթուղի վերականգնելու նման փորձ մինչ այդ չենք ունեցել: Երկաթողու գոյության ողջ ընթացքում նման ավերումներ չէին եղել: Մեր նախագծողները, որոնք աղետից հետո ժամանել էին Հայաստան, իրականացրին ուսումնասիրություններ, արխիվները փորփրեցինք ու պարզեցինք, որ նման իրադարձություներ լինում են շատ հազվադեպ:
Ստեղծված իրավիճակում մեզ բավականին լուրջ աջակցություն ցուցաբերեցին ռուսաստանյան մեր գործընկերները: Տառացիորեն աղետից մի քանի ժամ անց, ես զանգեցի Ռուսական երկաթուղիներ ԲԲԸ-ի գլխավոր տնօրեն Օլեգ Բելոզորովին: Նա անմիջապես մասնագետներ ուղարկեց, ինչի արդյունքում կարճ ժամանակահատվածում գնատեցինք վերականգնողական աշխատանքների ծավալը, իսկ դրանից հետո եկան մասնագետները, որոնք իրենց ամենօրյա աշխատանքի ընթացքում առնչվում են նման ավերումների հետ եւ տեղյակ են, թե ինչ տեխնիկական լուծումներ են անհրաժեշտ կարճ ժամկետներում երկաթգիծը վերականգնելու եւ երկաթուղու գործունեությունը շարունակելու համար »,-ասաց Մելնիկովը:
Կարդացեք նաև
Նա տեղեկացրեց, որ շուրջ 40 տարբեր մասնագետներ էին գործուղվել Հայաստան. «Դա հրաշալի դեսանտ էր…Պրոֆեսիոնալների փորձի ու գիտելիքների շնորհիվ 2 օր վերականգնողական աշխատանքների ծրագիր կազմեցինք, որտեղ ամեն րոպեն հաշվարկված էր…Վրաստանի, Այրումի կողմից սկզբում վերականգնողական միջոցներ չունեինք, բայց ՏԿԵՆ նախարարության մեր գործընկերների հետ միասին կարողացանք հաղթահարել խնդիրները: Նախ վերակագնվեց կամուրջներից մեկը, որը մեզ համար կենսական նշանակություն ուներ…Հայաստանը մի երկիր է, որը տիրապետում է շինարարական բավարար ռեսուրսների, շուրջօրյա աշխատանքը կազմակերպվեց արդյունավետ եւ գրագետ, իբրեւ արդյունք հունիսի 14-ին 12:30 արդեն իսկ շարժը Սանահինից սկսած՝ վերականգնված էր, իսկ հունիսի 21-ին աշխատանքն ավարտեցինք ամբողջությամբ, երկաթուղին բերվեց նախկին տեսքին, այն տեսքին, ինչպիսին կար աղետից առաջ: Այժմ որոշ ամրացումներ ենք կատարում»:
Գոհար ՀԱԿՈԲՅԱՆ
